Unha moza invidente denunciou que un taxista de Santiago non lle permitiu subir ao coche co seu can guía.
Segundo informa Televisión de Galicia, os feitos ocorreron o pasado sábado, cando Jacqueline Duarte se dispuña a coller un taxi xunto a dúas amigas, tamén invidentes, á saída dun centro comercial.
A moza asegura que o taxista se negou a transportar ao can e tampouco lles facilitou o seu número de licenza.
"O triste é que hai moitas cidades nas que isto é o pan de cada día. Para nós o can é unha ferramenta de mobilidade. Son os nosos ollos", afirma Jacqueline Duarte.
A moza denunciou o incidente en redes sociais e ante o colectivo Radio Taxi Compostela, que está a investigar o sucedido.
O taxista denunciado nega os feitos e asegura que non atendeu ás mozas porque tiña outra clienta esperando.
Radio Taxi Compostela afirma que, de confirmarse a versión de nbsp;a&moza, o colectivo sancionará ao traballador.