martes. 01.12.2020 |
El tiempo
martes. 01.12.2020
El tiempo

Norvento inaugura nas Gándaras un dos edificios "máis avanzados do mundo" en enerxías renovables

Norvento inaugura en Lugo uno de los edificios "más avanzados del mundo"

Ten capacidade para acoller 200 traballadores e inclúe un laboratorio de experimentación

A empresa lucense Norvento presentou este luns as instalacións do seu Centro de Innovación Norvento Enerxía (Cine), un dos edificios "máis avanzados e innovadores de todo o mundo", en palabras do seu fundador, Pablo Fernández Castro, dado que a tecnoloxía desenvolvida pola propia compañía permítelle autoabastecerse de toda a enerxía —renovable— que necesita para funcionar, sen estar conectado a ningunha rede externa. Á presentación do novo edificio asistiron o presidente da Xunta de Galicia, Alberto Núñez Feijóo, e o comisario europeo de Acción polo Clima e a Enerxía, Miguel Arias Cañete; acompañados por outras autoridades como o delegado do Goberno en Galicia, Santiago Villanueva; a alcaldesa da cidade, Lara Méndez; ou o presidente da Deputación, Darío Campos, entre outros.

Situado no polígono industrial das Gándaras, no municipio de Lugo, o novo edificio é o resultado de seis anos de traballo, desde o seu deseño ata a súa construción, cun investimento total de 12 millóns de euros. Ten capacidade para acoller un persoal de 200 traballadores e, ademais de ser o principal centro de operacións da compañía enerxética e de monitorización dos seus parques eólicos, inclúe tamén un laboratorio para experimentación.

O deseño do edificio, que ocupa unha superficie de 4.000 metros cadrados, foi obra do arquitecto navarro Patxi Mangado

Dada a súa capacidade para autobastecerse da enerxía necesaria para funcionar de forma independente a calquera rede externa, Pablo Fernández destacou que o edificio Cine é un claro expoñente de como a tecnoloxía desenvolvida por Norvento pode "axudar ao sector industrial" a seguir o mesmo camiño. Desde o seu punto de vista, é "cuestión de tempo", pero o camiño a seguir por parte da industria pasa, precisamente, pola súa plena capacidade de autoabastecemeento e autoxestión enerxética mediante fontes renovables.

O deseño do edificio, que ocupa unha superficie de 4.000 metros cadrados, foi obra do arquitecto navarro Patxi Mangado, e Pablo Fernández Castro recordou que as súas instalacións son froito de décadas de traballo no ámbito da I+D+i, dado que están baseadas "na tecnoloxía desenvolvida pola propia empresa".

Queremos lanzar unha mensaxe ao conxunto do sector industrial e empresarial: xa é posible cambiar o xeito en que obteñen e xestionan a súa enerxía

"É un proxecto de máximos", dixo Pablo Fernández durante a súa intervención, "para probar ata onde poden chegar os nosos enxeñeiros", de modo que a "totalidade das súas necesidades enerxéticas", tanto de electricidade como de xerar frío ou calor, obtéñense "mediante fontes renovables in situ", grazas á integración de baterías que "permiten almacenar enerxía" nos momentos de alta produción. "Queremos lanzar unha mensaxe ao conxunto do sector industrial e empresarial: hoxe xa é posible cambiar o xeito en que obteñen e xestionan a súa enerxía en prol dunha maior eficiencia, aforro, e polo tanto unha maior competitividade. En definitiva, avanzar cara a unha verdadeira transición enerxética nas nosas economías", engadiu o presidente e fundador de Norvento.

En canto á compañía, que leva 35 anos operando no sector das enerxías renovables, o seu fundador recordou que é unha "das poucas empresas que actúan en toda a cadea de valor", o que permitiu alcanzar unha facturación de 42 millóns de euros en 2017, unha cifra que espera ver incrementada nun 60% en 2020, con investimentos por valor de 150 millóns. "Non son moitas as compañías no mundo cun modelo de negocio similar ao noso", insistiu, ademais de destacar a "gran vocación internacional" que ten a empresa.

En canto ao mercado eólico, recordou que Norvento está nestes momentos xestionando sete parques eólicos aquí en Galicia, aos que equipará coa tecnoloxía máis moderna e eficiente, dixo Pablo Fernández.

Norvento inaugura nas Gándaras un dos edificios "máis avanzados do...
Comentarios