Os grupos da oposición anunciaron este martes que solicitarán un pleno extraordinario a próxima semana para votar o cesamento da valedora do Pobo, Milagros Otero, aínda que a data para a súa celebración non está decidida.
Antes do inicio do pleno do Parlamento reuniuse a Xunta de Portavoces para analizar distintas cuestións xurdidas a raíz do escrito da propia Valedora da pasada semana, no que anunciaba a súa intención de renunciar unha vez que os grupos acordasen uns novos responsables da institución.
Otero adoptou esta decisión tras a inadmisión a trámite do recurso de casación no Tribunal Supremo pola sentenza do TSXG que anulaba o proceso de contratación dunha persoa na institución, sobriña do expresidente Manuel Fraga, por desvío "de poder".
Os portavoces dos grupos da oposición explicaron que a Valedora ten ata o sábado para que formule por escrito as súas alegacións á petición de destitución presentada por En Marea e BNG, que pretendían que se votase este mesmo martes no pleno.
Con todo, os letrados do Parlamento sinalaron que non pode comezar ese proceso sen que se cumpra o Regulamento, é dicir, sen que se celebre o trámite de audiencia; polo que unha vez que conclúa a oposición rexistrará a petición da celebración dun pleno extraordinario co punto único de votar a destitución de Otero.
A iso, hai que sumar que a propia valedora cambiou o escrito rexistrado na Cámara autonómica. Concretamente, o pasado venres rectificou a fórmula para a súa substitución con respecto ao documento inicial do xoves, usando a fórmula de "renuncia" pero supeditada a ese acordo parlamentario.