O oito principais formacións políticas que se presentaron ás eleccións municipais do pasado domingo na Coruña comprometéronse coa Asociación da Prensa (APC) a non convocar roldas de prensa sen preguntas nin a vetar a ningún medio de comunicación ou xornalista.
Trátase de Vox, Democracia Coruñesa, Alternativa dos Veciños, Ciudadanos, BNG, PSOE, PP e Marea Atlántica, cuxos líderes asistiron ao Hotel Finisterre para participar nos Almorzos Electorais convocados pola APC.
"Entendemos que a ausencia de vetos e a aceptación de preguntas é unha cuestión básica para que os profesionais dos medios de comunicación poidan levar ao cabo o seu traballo con normalidade e daremos conta de calquera incumprimento deste compromiso que se produza", advertiu a asociación.
