A Policía Nacional investiga o descubrimento dun cadáver que apareceu flotando na tarde deste mércores nunha área próxima ao Museo do Mar de Vigo. Os pés e as mans estaban atados, aínda que en principio o caso apunta a que se trata dun suicidio.
Submarinistas do corpo de bombeiros de Vigo foron quen se mergullaron para recuperar o corpo e trasladalo a terra. O home presentaba ligaduras con cadeas en pés e mans, así como un contrapeso, segundo detallou Atlántico Diario, que engade que as primeiras hipóteses apuntan ao falecemento voluntario como explicación, xa que incluso habería testemuños que viron como a vítima se arroxaba á auga.
De todos os xeitos, o caso atópase baixo investigación policial, seguindo os protocolos marcados para este tipo de sucesos.