O consello de administración da Autoridade Portuaria da Coruña acordou, nunha reunión celebrada este mércores, solicitar ao Goberno que "o libere" da débeda, por importe de 200 millóns de euros, contraída pola execución das obras da dársena exterior de Punta Langosteira.
Fíxoo nunha reunión da que se ausentou o concelleiro de Rexeneración Urbana do Concello da Coruña, Xiao Varela, despois de que non se aceptase debater a proposta municipal sobre a condonación da débeda. Á saída do organismo portuario, en declaracións aos xornalistas, tachou de chiringuito "do PP" á Autoridade Portuaria.
"Cumpríronse os peores prognósticos", sinalou o concelleiro tras explicar que optou por ausentarse do consello de administración ao non existir "a posibilidade de debate" da proposta que o goberno local coruñés levaba á citada reunión.
Nela, pedía a condonación da débeda do porto ligada á construción da dársena exterior ou conceder "axudas económicas equivalentes". Tamén reclamaba "deixar sen efecto" o protocolo asinado polo Ministerio de Fomento, Xunta e Portos do Estado o pasado mes de abril en relación ao futuro dos peiraos coruñeses.
Para o concelleiro, o feito de que non se debateu a proposta municipal "demostra que a Autoridade Portuaria é un chiringuito do PP". "Utilízano como ferramenta partidista para facer dano ao resto dos partidos políticos", criticou.
Por outra banda, lamentou que non asistisen os representantes do Estado no consello de administración. "Pídolles que dean un paso adiante, que estean presentes neste proceso porque o obxectivo segue sendo preservar os terreos dos peiraos interiores e que non se malvendan".
ACORDO. Preguntado polo feito de que non se debatese a proposta municipal, o presidente da Autoridade Portuaria, Enrique Losada, argumentou que se presentou tarde. "E incluía unha serie de mencións que non viñan a conto", expuxo sobre os puntos que figuraban na proposta. Mentres, remarcou a unanimidade dos conselleiros.
