Un potente anticiclón instálase en Galicia polo menos outra semana máis

A xornada de mañá será a máis calorosa en toda a comunidade, co sur de Pontevedra e Ourense cos termómetros a 40 graos
Una pareja se baña en el río en Ourense. EFE
photo_camera Una pareja se baña en el río en Ourense. EFE

As altas temperaturas regresan á Península, onde se prevén máximas de 40 graos, informa a Axencia Estatal de Meteoroloxía na súa páxina web. En Galicia, o potente anticiclón déixase sentir especialmente no sur da comunidade.

Ante esta situación, en Galicia activouse o nivel amarelo por calor -non existe risco meteorolóxico para a poboación en xeral, aínda que si para algunha actividade concreta-, xa que se esperan 40 graos no sur de Ourense e Pontevedra. De feito, o xoves a situación vivida xa foi tórrida no Baixo Miño, onde se alcanzaron 38 graos; en Ourense, 36, e en Ribas de Sil, 34,4.

Esta será a tónica, polo menos, durante todo o fin de semana, que lucirá ceos despexados e sensación de intensa calor nas catro provincias, especialmente na xornada de mañá. A Coruña e a súa costa alcanzará os 30 graos, mentres na Mariña superaranse os 27.

O tempo plenamente estival non será, ademais, flor dun día. Veu para quedar polo menos outra semana máis, xa que a previsión apunta a que o sol lucirá en practicamente toda a comunidade polo menos ata o vindeiro venres, día 24. As temperaturas, no entanto, descenderán de forma notable a partir do mércores.

Neste panorama de sol case perpetuo a única excepción será A Coruña e a comarca de Ortegal, onde o luns se esperan orballos. Será, con todo, un lapsus de 24 horas, posto que o martes xa volverán os ceos despexados.

Este potente anticiclón afecta con maior incidencia ao sur peninsular, onde en Estremadura, por exemplo, rexistráronse oito das dez temperaturas máis altas de España, coas localidades de Alconchel e Mérida, en Badaxoz, á cabeza, onde o mercurio alcanzou os 32,4 graos, segundo a Axencia Estatal de Meteoroloxía.

Ademais, Alburquerque (Badaxoz) foi o terceiro municipio español onde máis custou conciliar o soño, con 31,6 graos, mentres que a estación de Castuera, tamén na provincia de Badaxoz, rexistrou 31.3 graos.

Por este motivo, a Dirección Xeral de Protección Civil alertou por altas temperaturas tamén a Badaxoz, Córdoba, Huelva, Sevilla e Xaén, onde se superarán os 40 graos.

Ante esta situación, Protección Civil recomenda limitar a exposición ao sol, manterse en lugares ben ventilados, inxerir comidas lixeiras, ricas en auga e sales minerais, como froitas e hortalizas, e beber moita auga.

Comentarios