jueves. 14.11.2019 |
El tiempo
jueves. 14.11.2019
El tiempo

Recadan diñeiro para a familia da Estrada que o perdeu todo nun incendio

O taller, no que había catro coches, tras o incendio en Berres. PATRICIA FIGUEIRAS
O taller, no que había catro coches, tras o incendio en Berres. PATRICIA FIGUEIRAS
Vecinos, coñecidos e foráneos consternados pola noticia envórcanse en axudar aos afectados

Un matrimonio da parroquia estradense de Berres e os seus dous fillos quedaron, literalmente, co posto, tras o voraz incendio que na tarde-noite do pasado xoves arrasou a súa vivenda e o taller mecánico anexo que sustentaba a economía familiar. Mario Rodríguez Oca foi un dos veciños que durante as horas nas que os servizos de urxencias traballaron na extinción permaneceu á beira dos afectados, arroupándoos.

Mario estivo, como eles, ata ben entrada a madrugada e, cando tocou retirarse, continuou axudando: iniciou unha campaña de recollida de donativos a través da a plataforma dixital GoFundMe desde a que calquera persoa pode facer a súa achega para contribuír á reconstrución dos inmobles.

As entregas de diñeiro poden facerse buscando o nome Vítimas dun incendio en Berres, formalizándoas de xeito anónimo ou especificando quen achega o diñeiro, na cantidade que cada un considere adecuada.

Os fondos quedan depositados nunha entidade bancaria e serán entregados a Manuel Neira Ferro (o afectado), á súa muller, Luisa Iglesias, e aos seus dous fillos para que poidan volver levantar o seu fogar. Nestes momentos, non dispoñen de póliza de seguro e o lume arrasou por completo o seu taller (onde había polo menos catro coches), o baixo da casa e o trasteiro. O tellado crebou no seu parte central e por ese oco saíron as chamas, facendo o efecto de cheminea. Os mobles de habitacións, cociña e demais estancias do piso superior, o destinado a vivenda, non arderon, pero se viron afectados o fume, do mesmo xeito que os aveños. Debido ás altas temperaturas que se concentraron, a plaqueta do chan quedou levantada.

Técnicos do Concello desprazáronse á vivenda este venres para supervisar o seu estado. "Dixéronnos que o que nos fixese falta", explica Luisa Igrexas. Está por estudar en profundidade en que medida o incendio afectou á estrutura do domicilio, polo momento inhabitable. Os seus propietarios pasaron a noite en casa de familiares. "O principal é que a nós non nos pasou nada", consolábase Luisa mentres, con bágoas nos ollos, observaba as desfeitas e recordaba o rápido que pasou todo. "Foi cousa de minutos". Sinala que nin ela nin o seu marido estaban en casa no momento de iniciarse o lume, que, apunta, prendeu nun coche do taller. Atopábanse cerca, nunha leira, e foi un veciño quen os avisou. "Cando chegamos xa non se puido facer nada, xa estaba estendido. Había moitos materiais inflamables". O seu fillo si se atopaba no domicilio, pero non se decatou ata que lle timbraron. Á súa irmá puxérona ao tanto do incendio por teléfono, pois estaba en Pontevedra, onde estuda.

A familia agradece as mostras de apoio recibidas, incluso de moita "xente que nin sequera coñeciamos", así como a campaña solidaria, coa que se están envorcando veciños, coñecidos e persoas doutros lugares que queren achegar o seu gran de area.

Recadan diñeiro para a familia da Estrada que o perdeu todo nun...
Comentarios