domingo. 29.11.2020 |
El tiempo
domingo. 29.11.2020
El tiempo

Rueda achaca o fracaso dos acordos á "presión" dos sindicatos de Xustiza que "queren" a folga

Alfonso Rueda. AEP
Alfonso Rueda. AEP

Sitúa a pelota no tellado do comité de folga e reafírmase en que a Xunta non entrará "nunha poxa nin nun bucle sen fin" 

O vicepresidente da Xunta, Alfonso Rueda, lamentou de novo que na pasada xornada rompesen as negociacións para tentar buscar unha saída á folga dos funcionarios da Xustiza e, após de insistir en que había un preacordo con SPJ-USO, UGT, CSIF e CC OO, atribuíu o seu fracaso á "presión" dos outros tres sindicatos que conforman o comité -Alternativas na Xustiza-CUT, CIG e STAJ-.

Rueda, quen protagonizou a comparecencia ante os medios posterior ao Consello da Xunta dado que o presidente, Alberto Núñez Feijóo, participou nun acto na Coruña ao que acudía a Raíña Sofía, asegurou que, detrás desta presión hai motivos "adiviñables" e apuntou como o principal a que ditos sindicatos "queren que siga" o conflito que derivou nunha folga que dura xa máis de dous meses.

Preguntado sobre que deben facer os sindicatos para que se retome o diálogo, colocou a pelota no seu tellado e subliñou que son eles os que "teñen que responder a esta pregunta", xa que "saben" que pasos dar e son "coñecedores" da postura da Xunta. Dito isto, insistiu en que "nunca" vai entrar "nunha poxa nin nun bucle sen fin".

Entre tanto, lamentou que son "os xustizables os que non reciben os servizos fundamentais" e incidiu en que o paro afecta tamén a outros traballadores do sector como avogados e procuradores. "Tiñamos un principio de acordo após de moitas discusións e intercambios de pareceres ao que finalmente dixeron que non sen que os traballadores puidesen pronunciarse. O resultado é que a folga continúa, aínda que vai baixando. Hoxe é o pico máis baixo desde o primeiro día, pero hai moita xente prexudicada por esta situación e a Xunta laméntao", esgrimiu.

"CABREO NON, PERPLEXIDADE". Rueda afirmou que non é que teña "cabreo", pero si admitiu "perplexidade e indignación" pola actitude dos sindicatos, e reiterou as críticas que lles dirixiu na pasada xornada por varias cuestións. Entre outras, por exemplo, aludiu ao plan de recuperación do traballo. Na pasada xornada, esgrimiu que, fronte á formulación que facía a Xunta, os sindicatos querían unha recuperación "automática" do "10 por cento" e que "só recuperen os folguistas, non o resto de traballadores". Este xoves, Rueda indicou que "non se pode dar diñeiro por non traballar, por non cumprir obxectivos".

Tampouco quixo polemizar sobre determinadas cuestións que apuntaron os sindicatos, como que por exemplo a Xunta aceptara finalmente a cláusula que permitía que nunca baixasen do cuarto posto na táboa salarial de comunidades. "Estaban de cuartos e non ían estar nunca por baixo da media. Todo o demais non responde á realidade", aseverou.

Finalmente, preguntado acerca de se se arrepinte de non falar cos outros tres sindicatos que quedaron á marxe do preacordo, replicou que o catro cos que si negociou a Xunta "sentíanse moi cómodos" e "nunca" pediron "que se falase con ninguén máis". Concluíu que, do único que se "arrepinte" é de "pensar" que as centrais ían manter "o comprometido" e de "non calibrar" a influencia de Alternativas na Xustiza-CUT, CIG e STAJ.

ASEMBLEAS. Á mesma hora que se reunía o Consello da Xunta, os sindicatos de xustiza organizaron asembleas informativas nas sete cidades galegas para dar conta aos traballadores do ocorrido na mesa de negociación coa Xunta celebrada este mércores.

En primeiro lugar, fontes sindicais explicaron a Europa Press que o seguimento da folga incrementouse este xoves tendo en conta que, segundo indicaron, as declaracións formuladas polo vicepresidente da Xunta, Alfonso Rueda, após as negociacións o que fixeron foi "incendiar" aos traballadores.

ÚLTIMAS PROPOSTAS. Ademais, outras fontes sindicais sinalaron que os traballadores lamentan que o Goberno galego "se levantara da mesa" cando "o acordo estaba tan próximo". "A Xunta terá que explicar aos avogados, aos procuradores, a todos os cidadáns afectados por que se levanta da mesa cando o acordo estaba tan próximo", indicou.

En concreto, após de rebaixar a súa pretensión de subida de 180 euros máis ao mes, o Comité de Folga esixía un incremento liñal para todos os corpos de 140 euros, ligado a unha cláusula de revisión que mantería aos funcionarios galegos "sempre" no cuarto posto da táboa salarial por comunidades.

A última oferta da Xunta traduciuse en 140 euros máis para os médicos forenses, 135 para os xestores, 127 para tramitadores e 122 para os auxilios xudiciais. Todo iso aplicaríase en tres anualidades. Con todo, o propio vicepresidente, Alfonso Rueda, explicou que a proposta perdía "validez" no momento que non foi aceptada. Deste xeito, os sindicatos explicaron que continuarán as medidas de presión e protesta que viñan realizando, con novas accións que decidirá o Comité de Folga este xoves ou venres.

Rueda achaca o fracaso dos acordos á "presión" dos sindicatos de...
Comentarios