A Comunidade Salesianos España pagou a fianza de 12.000 euros para a posta en liberdade provisional de Segundo C.V., membro da congregación adscrito ao colexio María Auxiliadora de Vigo que estivo en prisión nove meses por supostos abusos sobre menores de idade e que aínda está á espera de xuízo.
Así o confirmou a Efe Javier Valiente, portavoz de Salesianos España, que se adheriu ao recurso do avogado de Segundo C.V. contra un auto do Xulgado de primeira instancia e instrución 4 de Cambados no que se denegaba a súa posta en liberdade provisional e que admitiu parcialmente a Audiencia de Pontevedra.
Esta comunidade relixiosa figura como responsable civil subsidiaria na causa, e como tal se ve na obriga" de pagar a fianza ao depender economicamente da mesma o relixioso acusado de abusos a menores, segundo trasladou á dirección do colexio, e esta á súa vez á comunidade educativa.
A dirección apresurouse a dar explicacións aos pais polo balbordo xerado ao transcender que como pagador da fianza figura a comunidade colexio María Auxiliadora.
Jesús Villegas, director do centro, puntualiza en declaracións a Efe que esta é unha "denominación histórica" da obra salesiana en Vigo, e desliga ao colexio dunha decisión, que, asegura, coñeceu cando o acusado xa estaba na rúa.
"Sería inxustificable nunha institución educativa. Máis aló do alcance ético deste asunto", asevera.
O portavoz de Salesianos España nega que o pago da fianza saíse dos donativos que os pais de alumnos deste centro fan á congregación, senón do seu fondo económico, que se nutre do que xeran os seus membros.
En canto aos donativos, o director do colexio María Auxiliadora de Vigo detalla que estes os ingresa a inspectoría salesiana Santiago El Mayor para sufragar "as súas necesidades" e para financiar "infinidade de proxectos", na confianza de que revertan nos propios centros dos que proveñen.
Resulta difícil atopar unha situación análoga no ámbito laboral español, nin sequera entre os funcionarios, que teñen dereito a que a administración sufrague os seus gastos de defensa se ven incursos nunha causa xudicial relacionada co exercicio do seu desempeño profesional e resultan absoltos ou se arquivan as actuacións.
O portavoz de Salesianos España xustifica o pago da fianza de Segundo C.V. en que "non ten recursos propios" e en que "todo o que gaña entrégao á comunidade".
Máis que unha relación entre empresa e traballador fala dunha relación "familiar", e seguindo co símil, sostén que "se un membro da familia delinque, a familia ten que facerse cargo da indemnización".
Javier Valente di comprender o debate moral que xera esta situación, xa que as presuntas vítimas tamén son membros da comunidade salesiana, pero antepón o dereito do seu compañeiro de congregación a quedar en liberdade provisional tras pasar máis de nove meses en prisión preventiva.
"Non vexo que haxa moito problema ao asunto. Non é que salga en liberdade, senón que queda en liberdade condicional. Está á espera de xuízo. Esperamos que sexa canto antes e resólvase esta situación, que nunca antes se nos presentou", asegura.
A avogada de varias das presuntas vítimas de abusos traslada a Efe que aos seus clientes "cústalles entender" que a comunidade salesiana prestouse a pagar a fianza de Segundo C.V.
O director do colexio admite que recibiu varias consultas, ben directamente ou a través do Ampa, de pais preocupados por esta situación e recalca que a prioridade, desde o principio, foi "arroupar" aos mozos e porse "ao servizo das familias".
Recorda que en canto tivo noticias dos supostos abusos, concretamente tocamentos a seis alumnos durante un campamento de verán en Cambados, activouse o protocolo de intervención para estes casos, apartouse ao relixioso do seu traballo con menores e abriuse un expediente informativo que se freou ao xudicializarse o asunto.
E engade que Segundo C.V. "non está vinculado á comunidade educativa nin o estará xamais. Non vai volver aquí baixo ningún concepto. Sería outro escándalo", remata.
O xulgado de primeira instancia e instrución 4 de Cambados decretou en xullo de 2019 o ingreso en prisión provisional comunicada e sen fianza deste relixioso salesiano por varios delitos de abusos sobre menores de idade, en dous casos de forma continuada.
A Policía Nacional detívoo por supostamente realizar tocamentos a polo menos seis menores mentres durmían nun campamento de verán en Cambados.O relixioso foi sorprendido mentres realizaba os tocamentos por outros menores.
