A Consellería de Sanidade culminou o proceso de adxudicación de 41 novas oficinas de farmacia que foron ofertadas en concurso público que, por primeira vez, realizouse a través do formato de acto único, celebrado o pasado mes de xaneiro.
O Diario Oficial de Galicia (DOG) publica este venres a resolución da Secretaría Xeral Técnica de Sanidade na que constan as 41 adxudicacións procedentes do concurso iniciado en xullo de 2018 e ao que foron convocados 604 participantes para o acto único celebrado a comezos de 2020.
Case a metade (20) das 41 farmacias sitúanse en concellos do ámbito rural, mentres que 14 corresponden a zonas semiurbanas e sete a áreas urbanas con crecemento poboacional, segundo detalla o Goberno galego nun comunicado.
Sanidade tamén destaca que neste concurso "fortaleceuse" a carreira profesional do ámbito da farmacia comunitaria, posto que 32 dos 41 primeiros postos do concurso exercen como farmacéuticos adxuntos en oficinas de farmacias.
Así, a experiencia profesional foi o criterio de maior peso no proceso de elección, xa que duplicou o seu máximo de valoración ao pasar de 30 a 60 puntos respecto ao anterior formato.
Deste xeito, a publicación no DOG da resolución definitiva de adxudicacións culmina un proceso iniciado no verán de 2018 e que, segundo sinala a Xunta, foi "complexo" porque, ademais da "complexidade" da baremación, foi necesario "respectar a opción dos concursantes para realizar achegas e alegacións".
A iso, Sanidade engade que este foi o primeiro concurso no que a presentación da documentación debía facerse obrigatoriamente por vía telemática.
