A autopsia de Desirée Leal, a menor de sete anos que foi achada morta na súa casa de Muimenta o pasado 3 de maio, apunta a que puido ser asfixiada pola súa nai cunha almofada e que non faleceu por envelenamento ou intoxicación. A proxenitora, Ana Sandamil, é a única investigada por un presunto delito de asasinato ou homicidio.
Os informes preliminares, que se inclúen no sumario do caso -a responsable do xulgado de instrución número 1 de Vilalba levantou hai días o segredo-, sinalan que a causa do falecemento da menor foi unha asfixia por compresión en boca e nariz, e aínda que non se detalla cal foi o obxecto que se utilizou para iso todo apunta a que foi provocada coa almofada da cama na que apareceu a nena, que xa estaba morta cando chegaron os servizos de urxencias.
Segundo fontes próximas á investigación, nunha primeira observación ocular do domicilio, no que a pequena vivía coa a súa nai coa súa avoa, descubríronse pequenos restos de sangue nun dos extremos laterais da almofada que había na cama.
Segundo as mesmas fontes, as manchas xa estaban alí antes de que chegasen os sanitarios e a menor non presentaba ningún corte ou ferida que puidese provocar o sangrado.
A instrución consta dun sumario de dous tomos e 500 folios en total
Na cama tamén se atoparon restos dun líquido que os investigadores detectaron despois no interior dunha pequena botella de auga que se mandou a analizar.
Supostamente era un cóctel de pastillas antidepresivas, e das mesmas acháronse restos previos machucados noutro bote, que estaba na cociña, o que leva a pensar que o suposto crime non foi consecuencia dun arrebato senón algo máis meditado.
Os investigadores relacionaron desde o principio este cóctel co falecemento da pequena, aínda que conscientes de que as cantidades inxeridas teñen que ser moi elevadas para causar a morte dunha persoa.
Segundo revelan agora os informes forenses, esta sustancia, que foi sinalada como causa probable da morte desde o principio -o propio pai da nena recoñecía a este xornal nos primeiros días tras o tráxico suceso que cando os avós maternos da pequena chamárono para dicirlle que Desirée morrera xa lle indicaron que crían que inxerira algo- non foi determinante no falecemento da pequena. Os restos que detectou a autopsia no sangue e no estómago da menor son mínimos e as cantidades son tan baixas que tampouco fan pensar que a pequena estivese a ser medicada en longo tempo.
O avogado da madrae descartou facer declaracións; desde o despacho que contratou o pai aseguran que estudan as actuacións
INSTRUCCIÓN. O caso continúa en fase de instrución no xulgado número 1 de Vilalba, polo que a investigación continúa aberta e aínda faltan os informes definitivos e os resultados dalgunhas das probas.
A única investigada pola morte de Desirée, Ana Sandamil, continúa ingresada no módulo de presos do Hula, tras ser derivada desde Psiquiatría e á espera de que lle dean o alta para ser trasladada a un centro penal. Segundo fontes próximas, está a ser tratada dunha patoloxía por médicos psiquiatras, aínda que non transcendeu nada sobre o seu perfil médico.
No caso, aparte do ministerio fiscal e a acusación particular está acudida como acusación popular a Fundación Amigos de Galicia, que defende os dereitos da infancia e que se cumpran as penas.
