Traballadores do servizo de atención telefónica do 061 volverán á folga o 21 de xaneiro

A CIG sinala que Grupo Norte anunciou a semana pasada que vai suspender o pago dos pluses acordados no laudo que puxo fin ao conflito derivado do traslado

Representantes dos PACs en Pé de Guerra participaron en Vigo nunha mobilización que reclamaba melloras no sector das ambulancias. TWITTER
photo_camera Representantes dos PACs en Pé de Guerra participaron en Vigo nunha mobilización que reclamaba melloras no sector das ambulancias. TWITTER

Traballadores do servizo de atención telefónica do 061 volverán á folga o próximo 21 de xaneiro, segundo informa a CIG, "en resposta aos incumprimentos salariais e laborais por parte da empresa concesionaria, Grupo Norte". 

A decisión, de acordo coa central nacionalista, foi adoptada en asemblea este mércores, cando tamén se aprobou desenvolver outras "medidas de presión para esixir o pago dos pluses de compensación polo traslado do centro de traballo á Estrada". 

A CIG sinala que Grupo Norte anunciou a semana pasada que vai suspender o pago dos pluses acordados no laudo que puxo fin ao conflito derivado do traslado. 

"Este incumprimento súmase á decisión unilateral da empresa de reducir os pagos de incentivos en decembro de 2017 do 7,5% ao 5% da masa salarial e o incumprimento das cláusulas sociais ofertadas no concurso no que gañou a concesión", apunta. 

Antes da folga, o 15 de xaneiro, está prevista unha nova reunión no marco do Consello Galego de Relacións Laborais, que foi solicitada por decisión do comité.

AMBULANCIAS DO 061 
Por outra banda, tamén a central nacionalista, a través doutra nota de prensa, ante o anuncio de que as empresas de ambulancias do 061 valoran deixar de prestar servizo a partir de marzo, advirte de que "non vai consentir en ningún caso que sexan os traballadores os que paguen a mala xestión das compañías adxudicatarias da Xunta". 

Este anuncio, ao seu xuízo, é "a confirmación do que a CIG leva tempo denunciando: que os contratos se adxudicaron por baixo dos custos reais e que as empresas presentaron ofertas temerarias, aínda sabendo que así non poderían cumprir coas condicións recollidas nos pregos nin no convenio colectivo de aplicación". 

Comentarios