martes. 01.12.2020 |
El tiempo
martes. 01.12.2020
El tiempo

As universidades planificarán pautas "eficaces" para reactivar o sector turístico galego

Autoridades na presentación dos traballos do plan director 2021-2023 Galicia Destino Seguro. LAVANDEIRA JR (Efe)
Autoridades na presentación dos traballos do plan director 2021-2023 Galicia Destino Seguro. LAVANDEIRA JR (Efe)
Redactarán un informe con propostas concretas para 2021, "aproveitando o impulso do Xacobeo"

As tres universidades galegas colaborarán co Cluster Turismo de Galicia e coa Xunta para planificar pautas "eficaces" e propostas "concretas" que contribúan á recuperación e reactivación do sector ante a crise xerada pola pandemia do coronavirus. 

Na presentación do plan director 2021-2023 Galicia Destino Seguro participaron este mércores o vicepresidente primeiro do Goberno galego, Alfonso Rueda; o conselleiro de Educación, Román Rodríguez; a responsable de Turismo, Nava Castro; os tres reitores, e o presidente do cluster, Cesáreo Pardal. 

Rodríguez —que ata a última remodelación do goberno era a titular da área de turismo— celebrou que o sector "se vai xuntar coa fonte de coñecemento, as universidades, que van achegar, colaborar e axudar á súa recuperación". 

Cesáreo Pardal, pola súa banda, expuxo as liñas principais desa "planificación estratéxica", que valorou para afrontar a crise que "castiga de forma cruel actividades esenciais como o turismo".

REPARTO DE ACTIVIDADES. Así as cousas, a Universidade da Coruña analizará a situación do sector turístico no novo contexto, abordará a detección de necesidades empresariais e fará un diagnóstico da oferta. 

Pola súa banda, a Universidade de Santiago de Compostela estudará o grao de preparación de Galicia como destino, por territorios, xeodestinos e cidades, entre outros aspectos. E a de Vigo encargarase de examinar a evolución do comportamento turístico e os hábitos do consumidor, así como o posicionamento galego. 

Baixo este enfoque "participado", o labor desenvolverase a partir de mesas de traballo, entrevistas e enquisas específicas. Todo iso deberá cristalizar nun primeiro informe que, no que queda de ano, expoña "pautas eficaces" para formular "propostas concretas para reactivar o turismo" xa en 2021, "aproveitando o impulso do Xacobeo". 

Esta é "unha primeira fase de elaboración do diagnóstico", segundo Pardal, "e a partir do ano que vén" porase "en marcha" de novo a maquinaria para redactar "un plan cara a Semana Santa"

A idea, ademais, é "aproveitar a financiamento europeo" que se outorgue para a reconstrución "para impulsar proxectos" que apoien o turismo galego.

Alfonso Rueda, pola súa banda, subliñou que a comunidade galega "ten un plus", e que iso se viu este verán". "Somos percibidos como un destino con moitas vantaxes", valorou, antes de concluír que o que saia deste plan será "outro tipo de turismo", con menos "masificación" e "máis aire libre"

Universidades e Xunta comprométense a xuntar esforzos contra a violencia machista
A conselleira de Emprego e Igualdade, María Jesús Lorenzana, e os reitores das tres universidades galegas —Antonio López, da USC; Julio Abalde, da UDC; e Manuel Reigosa, da UVigo—, visitaron este mércores o centro de recuperación integral para vítimas de violencia xénero, onde fixeron balance dos dous anos de desenvolvemento do pacto de Estado contra a violencia machista en Galicia. 

No acto, presentado pola secretaria xeral de igualdade, Susana López Abella, fíxose balance tamén dos convenios de colaboración dos centros galegos para o desenvolvemento de medidas que, no marco dese acordo estatal, loiten por eliminar a desigualdade, non só na comunidade educativa, senón en toda a sociedade. 

A importancia de chegar "a todos" foi un dos puntos sinalados por Reigosa, que pediu a todo o sistema universitario que actúe de "avanzadilla" en materia de igualdade. Os tres reitores coincidiron no perigo que representa a "apertura de novas fendas de xénero", que se suman a aquelas "de sempre e aínda presentes". E un reto é a extensión do teletraballo. 

Unha sucesora para Abalde
No acto, Julio Abalde asegurou que, dado que non repetirá no cargo, gustaríalle que o sucedese nel unha muller. 

As universidades planificarán pautas "eficaces" para reactivar o...
Comentarios