A Central Sindical Independente e de Funcionarios (CDIF) denunciará a Tragsatec, a filial do Grupo Tragsa destinada ao servizo do medio ambiente, se non soluciona a falta de protección contra o Covid-19 dos 36 veterinarios de Lugo e A Coruña que este luns retomaron o seu labor nas campañas de saneamento gandeiro.
Segundo informa o sindicato, Tragsatec non dotou aos seus traballadores de equipos de protección individual (Epi), ademais de negar o análise de risco destes profesionais no protocolo de prevención fronte ao coronavirus, que si contempla este apartado para o persoal de oficina e os empregados que realizan tarefas de desinfección.
MÁSCARAS E DISTANCIA. A empresa dotou aos veterinarios de máscaras hixiénicas, aínda que os traballadores denuncian a súa inutilidade á hora de previr contagios. "Necesitamos máscaras FP2, que son as que protexen de fóra cara a dentro", declara unha das empregadas do servizo de saneamento gandeiro.
Outro dos asuntos que xeran controversia entre os traballadores é o da distancia de seguridade. Tragsatec recoméndalles gardar unha distancia de seguridade de dous metros, algo que os profesionais ven "imposible". "Nas campañas de saneamento dos animais como os tenreiros ou o gando de difícil manexo, que teñen que ser suxeitados o gandeiro, non podes cumprir esa distancia. É máis, pódeseche caer no corpo a suor do gandeiro que é o que suxeita ao tenreiro para que nós podamos facerlle a proba da tuberculina que consiste nunha picada no pescozo do animal", sentencia a veterinaria.
