viernes. 18.10.2019 |
El tiempo
viernes. 18.10.2019
El tiempo

Volta ao cole en clave verde

Dous escolares, na volta ao cole. AGN
Dous escolares, na volta ao cole. AGN
Sogama recorda que, con xestos sinxelos, as familias galegas poden abaratar o inicio de curso á vez que lle axudan ao planeta

Termina a semana da volta ao cole na maioría dos lugares de España e Galicia, onde miles de nenos puxeron fin a máis de dous meses de vacacións. Un momento sinalado cada ano en vermello no calendario que provoca unha pequena revolución familiar nos fogares: é tempo de volta á rutina, do encaixe de palillos para conciliar e, sobre todo, o momento de realizar un desembolso económico. E é que o custo da volta ao cole estímase en 758 euros por cada alumno galego entre matrículas, comedores, roupa e material.

Consciente deste esforzo que cada setembro realizan as familias, a Sociedade Galega do Medio Ambiente (Sogama) ofrece unha serie de consellos aos pais e os nenos que permiten aforrar diñeiro ao mesmo tempo que se axuda ao medio ambiente, xa que ambos os aspectos adoitan ir da man. Como é habitual cada vez que Sogama pon en circulación o seu material didáctico, non se trata de esixir grandes esforzos aos fogares senón que se busca concienciar aos galegos de que xestos moi sinxelos no noso día a día poden supor un importante aforro na factura da volta ao cole e un balón de osíxeno para o noso planeta.

A clave, unha vez máis, é a filosofía das tres erres: redución, reutilización e reciclaxe. Aplicando esta premisa a algunhas prácticas o regreso ás aulas será máis levadío para todos. En liñas xerais, trátase de moderar as compras e planificar a volta ao cole, pero o decálogo de Sogama inclúe moitas máis ideas.

MATERIAL

Libros, carteiras, cadernos, lapis, bolígrafos, tesoiras, cores, folios... A lista de material escolar que esixen os centros de educación infantil e primaria —en secundaria, cuxo arrinque de curso atrásase a esta semana que entra, xa adoita reducirse— é interminable... e cara. Equipar aos fillos para que empecen as clases leva o groso do gasto.

Pero por sorte, a maioría dos libros de texto —salvo aqueles de actividades sobre os que se escribe— son perfectamente reutilizables curso tras curso. O mercado de segunda man funciona ben, incluso na rede, o que abarata a factura. E co resto de material, Sogama aconsella comprar sempre que sexa posible produtos econógicos e libres de tóxicos, que axudan á saúde dos estudantes e do planeta. Os bolis recargables, as calculadoras solares que evitan as contaminantes pilas ou os folios reciclados son exemplos de boas prácticas.

E o outro groso da factura lévalla a roupa, sexa uniforme escolar ou non. Neste caso, Sogama aposta por buscar xente que xa non use eses uniformes para pedilos prestados, porque a maioría quedan novos tras un curso ou menos de uso; exactamente o mesmo que ocorre con moitas mochilas. Por outra banda, convén revisar ben os armarios para ver o que se ten e facer unha lista para comprar só aquelas pezas que sexan necesarias.

CONCIENCIACIÓN

Máis aló da factura que poida supor o curso escolar en cuestión de material, o día a día tamén obriga ás familias a realizar importantes desembolsos en cuestións como a alimentación ou o transporte. Hai que desprazarse a diario ao colexio, e en ocasións ata catro veces ao día, polo que o uso do transporte público ou a posibilidade de compartir coche particular entre varios pais alivia o peto e reduce significativamente as emisións contaminantes.

E o mesmo ocorre coa alimentación. Produtos sans e de proximidade benefician á saúde e ao planeta, todo o contrario que a bollería industrial. E de paso, sempre que se poida, hai que evitar os envases de plástico.

Volta ao cole en clave verde
Comentarios