Sábado. 19.01.2019 |
El tiempo
Sábado. 19.01.2019
El tiempo

A Xunta activará este ano contratos de ata 3 anos para médicos de Familia e Pediatría

O presidente da Xunta, Alberto Núñez Feijóo, e o conselleiro de Facenda, Valeriano Martínez.LAVANDEIRA JR (Efe)
O presidente da Xunta, Alberto Núñez Feijóo, e o conselleiro de Facenda, Valeriano Martínez.LAVANDEIRA JR (Efe)

Feijóo anuncia polo menos 4.300 prazas públicas para 2019 e estabilidade laboral para a 21.500 traballadores da Administración

O Goberno galego levará este venres á mesa sectorial de sanidade o acordo para ofrecer aos médicos de familia e aos pediatras que terminen o seu período de formación e aos que non teñan praza fixa contratos dun ano prorrogables durante outros dous.

Con esta proposta, avanzada a finais de ano no Parlamento de Galicia polo presidente galego, Alberto Núñez Feijóo, a Xunta pretende que antes de maio deste ano xa se poida comezar a aplicar, segundo dixo este xoves nunha conferencia de prensa posterior á reunión semanal do seu gabinete.

Así, poderán ser contratados tanto os médicos que estean Galicia como aqueles que o fagan noutra comunidade e incluso noutros países, tamén extracomunitarios, a condición de que teñan unha formación homologable ao MIR español, indicou.

Núñez Feijóo insistiu en que as tensións que se dan agora na sanidade galega déronse noutras autonomías recentemente e defendeu que Galicia conta coa "mellor atención primaria que teña nunca, con calquera dato".

Recoñeceu, en calquera caso, que hai problemas e, para atallar un deles, destacou a proposta de estabilidade no emprego para médicos de familia e pediatras ata que poidan facerse cunha praza fixa.

Trátase dun sistema posto en marcha en País Vasco e agora en Galicia, incidiu Núñez Feijóo, que responsabilizou novamente ao Goberno central de non planificar adecuadamente o número destes profesionais necesarios e dun "atraso" de seis meses na convocatoria da comisión de recursos humanos.

"Cada vez que hai unha baixa por calquera motivo (entre persoal) hai moitas dificultades para cubrila (...) a cota do día desprázase e xérase unha presión asistencial moi potente", asegurou Núñez Feijóo.

O presidente galego destacou, de todos os xeitos, que a Xunta está a escoitar as reclamacións dos profesionais e dos pacientes e por iso, entre outras decisións, expuxo esta solución de contratación para atender as demandas de ambos os colectivos.

Explicou, ademais, que os profesionais que sexan contratados terán "igualdade de condicións" que o resto de facultativos do Sergas, o órgano da Xunta que xestiona hospitais e centros médicos públicos, e desempeñarán as súas funcións "nun ou máis centros de saúde (ata tres máximo, en función do tamaño) pero sempre no mesmo distrito sanitario".
 

4.300 novas prazas públicas e estabilidade laboral

O Goberno galego alcanzou un preacordo cos sindicatos UXT e CCOO para dar estabilidade a 21.500 empregados públicos, funcionarios e persoal laboral, na Administración autonómica.

Xunto ao conselleiro de Facenda, Valeriano Martínez, Feijóo destacou que é un acordo "histórico" e "excelente" que permitirá, ademais de darlles estabilidade, dotar de carreira profesional a estes empregados, incrementar as súas retribucións e profundar no proceso "voluntario" de funcionarización do persoal laboral.

Ao final do período do acordo os funcionarios e o persoal laboral que non se fixo funcionario debe ter un posto estable, segundo explicou o mandatario galego ao termo da reunión semanal do seu gabinete, e ao final da súa aplicación a taxa de interinidade debe ser "inferior ao 7 %", engadiu.

En canto ás retribucións, desde este mesmo mes haberá un aumento medio do 6 %, entre os compromisos do acordo marco estatal e os da Xunta, que se irá incrementado ademais o próximo ano. Os funcionarios poderán beneficiarse, ademais, de aumentos anuais de forma gradual de ata 760 euros na categoría máis baixa ata os 2.460 euros na máis alta.

Feijóo tamén destacou que entre este ano e o próximo a oferta de emprego pública será "como mínimo" de 4.300 prazas.

"Veñen moi bos anos para converterse en empregado público de Galicia. Dos últimos 20 anos os mellores van ser o entre o 2019 e o 2021", dixo Núñez Feijóo, que animou aos candidatos formar parte da Administración autonómica a formarse "porque vai haber moitas prazas", xa que se xubilará moita xente e hai en marcha un proceso retributivo e unha consolidación "históricas", afirmou.

A Xunta activará este ano contratos de ata 3 anos para médicos de...
Comentarios