O vicepresidente da Xunta, Alfonso Rueda, solicitou ao delegado do Goberno en Galicia, Javier Losada, "aclarar" como se delimita o horario de saídas da poboación na comunidade, se é por concellos ou por núcleos poboacionais.
O Executivo de Pedro Sánchez estableceu que todos aqueles concellos con menos de 5.000 habitantes non se imporán restricións horarias para a saída dos seus veciños á rúa na fase 0, mentres que aqueles que superen esta cifra deben acollerse ás tres franxas horarias que determinou o Ministerio de Sanidade.
Unha vez publicados os criterios acordados por Moncloa, algunhas comunidades como Asturias propuxeron ao Executivo que, en lugar de tomar como referencia o padrón municipal no seu conxunto, se tivesen en conta os núcleos de poboación para atender á dispersión de xeográfica da cidadanía. Así, finalmente Asturias adoptou esta fórmula.
Por este motivo, este sábado a Xunta pediu a Javier Losada clarificar as "dúbidas dos concellos e dos cidadáns", xa que o número de poboación afectada polas restricións horarias varía "considerablemente nun caso ou noutro".
Esta solicitude nace por mor de varias "consultas" que localidades con máis de 5.000 habitantes realizaron á Administración autonómica, xa que "queren saber se os seus núcleos de poboación" poden aplicar "a liberdade horaria para saír ou se están suxeitos a franxas horarias determinadas".
