A Xunta relaxa a esixencia de permanencia de actividade e emprego de Emega

O motivo é a pandemia causada polo coronavirus

O Diario Oficial de Galicia (DOG) publica este xoves unhas modificacións nas bases reguladoras do programa de fomento do emprendemento feminino Emega, que relaxan as esixencias da permanencia da actividade e de emprego creado coas iniciativas debido á crise derivada da Covid-19. 

Nun comunicado a Xunta explica que os cambios afectan á convocatoria de 2018, concretamente aos prazos de execución de dous anos das iniciativas subvencionadas. Nesa edición concedéronse axudas a 72 proxectos, coa creación e mantemento de 113 empregos. 

Durante a súa execución, expón o Goberno galego, decretouse o estado de alarma e o confinamento, o que afectou de forma directa a moitas destas empresas. Isto levou a reducir a esixencia de permanencia da actividade e do mantemento do emprego, de forma que se recorta o período de dous anos e requírese só o prazo que vai entre a data de inicio de cada proxecto e o inicio do estado de alarma. 

A Xunta indicou que tamén prevé adaptar as bases da convocatoria de 2019 para "minimizar os efectos" que poidan ter os peches de negocios das 161 mulleres beneficiarias nesa edición. Na deste ano, agregou, xa se incorporan cambios para "reforzar o apoio ás emprendedoras" no actual contexto. 

O obxectivo é garantir a pervivencia das empresas, indicou. Este exercicio ponse máis "énfase" nas axudas de strong <>unha das catro liñas do Emega: a dirixida á reactivación e consolidación de empresas con incentivos para a renovación, ampliación ou cambio de localización para paliar unha situación económica adversa. 

O programa conta este ano cun orzamento de 1,7 millóns de euros, cofinanciados polo Fondo Social Europeo, unha cantidade igual á do exercicio anterior. Nos últimos catro anos, a dotación foi de 4,9 millóns de euros, o que permitiu financiar entre 2016 e 2019 un total de 318 proxectos, que xeraron 695 empregos. 

Comentarios