sábado. 05.12.2020 |
El tiempo
sábado. 05.12.2020
El tiempo

O Parlamento aproba apoiar a Guaidó como presidente "lexítimo" de Venezuela

Bancada dos populares no Parlamento galego. XOÁN REI (EFE)
Bancada dos populares no Parlamento galego. XOÁN REI (EFE)

A iniciativa contou cos votos a favor de PPdeG e PSdeG e en contra de En Marea e BNG

O secretario xeral do PPdeG, Miguel Tellado, chamou "novos fachas" aos deputados de En Marea e BNG no Parlamento galego por votar en contra unha iniciativa para "apoiar" á Asemblea Nacional de Venezuela e o seu presidente, Juan Guaidó, que foi aprobada cos votos dos grupos Popular –autor da moción– e Socialista. 

Durante o debate desta proposición non de lei, que recolle que o país latinoamericano "inicie un proceso de normalización democrática dando paso a eleccións libres", tanto a deputada do Bloque Montse Prado como a de En Marea Eva Solla mostraron o rexeitamento dos seus grupos ao que consideran un "golpe de estado" dirixido polo autoproclamado presidente encargado Juan Guaidó. 

Fronte á súa postura, o secretario xeral do PPdeG increpounos: "Vostedes levan unha semana vendo fachas por todas partes. Non vaia ser que os fachas sexan vostedes e non se miraron ao espello esta mañá". 

Máis concretamente, Tellado lamentou que o BNG "volva ás cavernas" e "ao século XIX". "Pensaba que un partido nacionalista defendería os intereses dos galegos en Venezuela", engadiu, para logo arremeter que "o nacionalismo galego quedou para ser unha copia mala do independentismo catalán" e "sacarse fotos con EH Bildu". 

Tellado (PP): "Vostedes levan unha semana vendo fachas por todas partes. Non vaia ser que os fachas sexan vostedes e non se miraron ao espello esta mañá"

A continuación, apuntou que a deputada de En Marea Eva Solla é "a única que queda" na postura do partido instrumental de apoiar a Nicolás Maduro, porque, tal e como afirmou o número dous do PPdeG, ata o secretario xeral de Podemos, Pablo Iglesias, "rectifica" sobre Venezuela. 

"O que me queda tremendamente claro tras este debate é que as mareas de Podemos e o BNG teñen un concepto da democracia ben distinto do noso, aínda que xa podiamos esperalo das mareas, porque a última vez que organizaron eleccións internas acabou como acabou", esgrimiu Tellado, en referencia ás primarias do pasado mes de decembro que deixaron dividido ao partido instrumental. 

Ademais, puxo o foco en que a eurodeputada galega do BNG, Ana Miranda, votase en Bruxelas en contra de recoñecer a Guaidó como presidente, "igual que o partido ultradereitista de Alemaña" e que "a Fronte Nacional de Marine Le Pen". Tamén sinalou que a europarlamentaria Lídia Senra (afín a En Marea e incluída no grupo da Esquerda Unitaria) "non apareceu sequera" na votación, optando por absterse "como Amencer Dourado", formación neonazi grega.

Eva Solla (En Marea): "En Venezuela non hai unha crise humanitaria, hai unha crise económica e social causada pola dereita"

Durante a defensa da iniciativa –que foi rexistrada, non en balde, co nome do presidente da Xunta, Alberto Núñez Feijóo–, o secretario xeral dos populares galegos reivindicou que Galicia "é moito máis que catro provincias" e que "máis de 2,7 millóns de persoas" que viven no seu territorio, recalcando que a emigración do século XX provoca que a Comunidade "nunca fose allea aos problemas" deste país. 

Pola súa banda, Eva Solla (En Marea) relacionou o apoio a Guaidó coas "guerras de quinta xeración" como as de Iraq, Iugoslavia, Siria ou Libia, cos medios de comunicación como "quinta fronte" e non como "cuarto poder". "En Venezuela non hai unha crise humanitaria, hai unha crise económica e social causada pola dereita", manifestou. 

A deputada do partido instrumental denunciou que existe "unha manipulación para xustificar unha intervención militar" liderada por Estados Unidos e apostou por sentar "a falar". "En Venezuela houbo unhas eleccións presidenciais, participaron catro candidatos e foi escollido un (Maduro). Cando pulsen o botón (para votar a iniciativa), deixen de frivolizar coa soberanía dos pobos, deixen decidir aos pobos os seus propios gobernantes", demandou Solla.

Montse Prado (BNG): "A crise en Venezuela está provocada, con Estados Unidos á fronte, polo control dos seus recursos, nomeadamente o petróleo"

Nestes termos a deputada do Bloque Montse Prado criticou que as "verdadeiras prioridades" do PPdeG e de Feijóo sexan "ir a Madrid a manifestarse co trifachito" mentres a "crise" en Venezuela está provocada con Estados Unidos "á fronte" polo "control dos seus recursos, nomeadamente o petróleo". E é que, segundo as súas cifras, ao estado iberoamericano mantéñenlle confiscados "máis de 3.000 millóns de euros en divisas que se poderían usar para comprarse medicamentos e alimentos". 

Ademais de defender "o diálogo, a paz" e "a autonomía dos pobos" na emenda presentada polos nacionalistas, Prado criticou que os numerosos gobernos que recoñecen a Guaidó como presidente venezolano "non din nada" a países como Arabia Saudita, "onde as mulleres non poden conducir sen ir acompañadas dun home", ou Israel, que lidera un "xenocidio" sobre o pobo palestino. 

Leiceaga indicou que os socialistas apostan por reestablecer "as condicións democráticas" en Venezuela"

Por parte do Grupo Socialista, Xoaquín Fernández Leiceaga xustificou o voto favorable á proposta do PPdeG en que a situación do país "está ao bordo do precipicio", descartando o "diálogo" entre as partes enfrontadas porque é "unha trampa, unicamente para que Maduro poida gañar uns meses". 

Tal e como explicou o portavoz do PSdeG no Pazo do Hórreo, Venezuela vive un panorama "desgraciado" cun PIB que descendeu "un 40%" nos últimos "catro ou cinco anos". 

Por iso, e porque "non hai separación de poderes" no país latinoamericano , Leiceaga indicou que os socialistas apostan por reestablecer "as condicións democráticas" en Venezuela, "igual que a maioría dos países da Unión Europea, igual que Canadá, Costa Rica e Ecuador". "Os que están detrás de Maduro son Rusia, China, Irán, Nicaragua ou Cuba", asentou. 

O Parlamento aproba apoiar a Guaidó como presidente "lexítimo" de...
Comentarios