O bispo de San Sebastián, José Ignacio Munilla, arremeteu este luns contra o feminismo "radical ou de xénero" e asegurou que "o demo meteu un gol desde as súas propias filas" á causa feminista.
Munilla reflexionou, no programa Sexto Continente, de Radio María, sobre a folga feminista do próximo xoves, e fíxoo diferenciando dous tipos de feminismo, o "feminino", que busca a igualdade xurídica e legal entre homes e mulleres, e o "radical ou de xénero", que pretende equiparar en todos os aspectos a ambos os sexos.
Na súa opinión, o "feminismo radical ou de xénero" ten como "vítima á propia muller e á verdadeira causa feminina".
"É curioso como o demo pode meter un gol desde as propias filas. O feminismo, ao asumir a ideoloxía de xénero, fíxose unha especie de hara kiri", afirmou.
O prelado criticou que o feminismo radical defenda as causas do "aborto libre e gratuíto", así como "o lesbianismo e o bisexualismo" e reprochoulle tamén que apoie a anticoncepción.
Dixo que o aborto se converteu nun "xenocidio feminino" porque en países como en China utilízase para que non nazan mulleres, á vez que criticou o "cortoplacismo" dos partidos políticos por non abordar auténticas políticas de natalidade. "Para reactivar a natalidade, hai que dignificar a maternidade", dixo o bispo.
Munilla admitiu que "existe un problema de fondo, o abuso cara á muller existe, existe un abuso que nace desde unha concepción machista, na que ese abuso da forza e do poder por parte do home ou de certos homes, convértese nun pecado contra a muller".
Ese machismo derívase, segundo o bispo donostiarra, de vivir "a nivel non racional" senón facelo a "nivel animal". "Aí xéranse relacións machistas, baseadas na lei do máis forte", reflexionou.
Na súa opinión, o cristianismo "prestou un gran servizo á dignidade da muller", por exemplo "ao defender a monogamia" e ao rexeitar o divorcio. "O feito de que alguén poida ter cinco mulleres reduce á muller a unha condición case de obxecto", argumentou.
REACCIÓNS. As palabras de Munilla desencadearon unha onda de críticas. Así, o Goberno vasco ve "incomprensibles, desafortunadas e inoportunas", unhas declaracións que para o alcalde de San Sebastián están "fóra de lugar" e, para a Deputación de Gipuzcoa afástanse do que pensa a maioría da cidadanía.
Ante a polémica, o Bispo asegurou este martes que as súas palabras foron "falseadas" e defendeu o desde a perspectiva cristiá, "de equidade e feminino".