Axentes da Policía Nacional detiveron en Ourense a un home como presunto autor de 129 delitos de roubo con forza en interior de vehículos estacionados en garaxes comunitarios perpetrados durante catro meses.
Segundo informou a Comisaría de Ourense, os feitos que motivaron a detención sucederon a partir do mes de novembro de 2017 cando empezou a detectarse vehículos violentados nos cales se aprecia unha marca deixada por un obxecto punzante no marco destes portelos, na parte da goma que fixa o portelo á carrocería, duns dous centímetros de ancho.
As mesmas fontes policiais relataron que este modus operandi "non o habitual practicado na cidade de Ourense, sendo normalmente violentadas con obxectos contundentes, tal como pedras, martelos, extintores" e sen deixar marca no portelo.
A Unidade de Delincuencia Especializada e Violenta da Comisaría Provincial de Ourense realizou as xestións de investigación pertinentes e intensificou o control de persoas e cacheo das mesmas que frecuenten as zonas "máis degradadas da cidade, coñecidas como zonas de trapicheo", concreta a Policía, "debido a que aínda que os danos causados aos vehículos son notorios, os obxectos que subtraen son de escaso valor, sendo susceptible de pensar que son cambiados por pequenas cantidades de droga para cubrir as súas necesidades", engade.
Durante o mes de febreiro de 2018 a comisión destes feitos delituosos concentrouse "nun número moi elevado nun só día, pasando a cometerse con maior frecuencia, e sempre en horario nocturno e en interior de garaxes", sostén a Policía.
Froito desta investigación e dispositivos operativos executados desde o mes de novembro ata finais de febreiro identificouse a un home sen domicilio coñecido que se trasladou ás distintas cidades de Galicia a través de tren. As súas estancias en Ourense coincidían cos feitos denunciados e tiña efectos intervidos tanto en Ourense como en Pontevedra, recoñecidos polos propietarios dos delitos de roubo con forza denunciados.
Por iso, os axentes procederon á súa localización, que resultou infrutuosa ao non dispor de domicilio coñecido e descoñecer o seu actual paradoiro e emitiuse unha orde requisitoria policial de procura, localización e detención. O arresto produciuse o 14 de abril por policías da Comisaría Provincial de Pontevedra.
O detido é un home de 41 anos de idade, natural da Coruña, a que lle constan 11 arrestos anteriores.
