Extinguido un incendio en dúas embarcacións do porto de Camariñas

O lume produciuse nunha das naves e propagouse nunha segunda

O servizo de prevención, extinción de incendios e salvamento (Speis) de Cee apagou un incendio en dúas embarcacións no peirao de Camariñas durante a madrugada deste domingo 9 de setembro.

Así o informou o Consorcio Provincial Contraincendios e Salvamento da Coruña nun comunicado, no que explicou que o aviso de que unha embarcación está a arder sobre o peirao é trasladado polo Centro de Atención ás Emerxencias 112.

Os axentes, ao achegarse até o punto da incidencia, atópanse cunha embarcación semirríxida que está "completamente calcinada", e o lume estaba a propagarse a unha segunda, que tamén comezaba a arder, segundo indicaron as mesmas fontes.

Deste xeito, procédese a sufocar o lume da segunda embarcación e a apagar o resto de chamas da primeira, operativo para o que se utilizaron uns 1.000 litros de auga. O Consorcio Provincial Contraincendios e Salvamento da Coruña asegurou que "non houbo máis danos materiais".

Para atallar a emerxencia tamén participaron axentes de Protección Civil de Camariñas e a Policía Local, así como un vehículo de bomba urbana lixeira (BUL) e un BNP. 

Comentarios