Jueves. 24.05.2018 |
El tiempo
Jueves. 24.05.2018
El tiempo

Investigados dous veciños de Mondariz polo suposto roubo de 55 farois en Fornelos de Montes

O material aínda non foi recuperado, polo que a investigación continúa aberta para pescudar o seu destino e a posible participación doutras persoas no roubo

A Garda Civil investiga a dous veciños de Mondariz como supostos autores do roubo de 55 farois que estaban depositados no antigo campo de fútbol de Fornelos de Montes, utilizado na actualidade como depósito de materiais dos servizos municipais. 

As investigacións realizadas polos efectivos da Garda Civil de Fornelos de Montes iniciáronse o 19 de xaneiro, tras a denuncia dun representante do Concello. Unha vez feitas as primeiras comprobacións púidose constatar que os autores tiveran que saltar o muro de peche para acceder ao interior do recinto e que tiveron que valerse dun vehículo para o transporte dos farois, dos que 25 eran novos e o resto usados e en mal estado. 

Por mor destas investigacións e da colaboración cidadá, os axentes identificaron o vehículo que, supostamente, fora utilizado no roubo. A través del puideron identificar aos supostos autores, un home e unha muller, de 24 e 28 anos de idade, respectivamente, que teñen o seu domicilio en Mondariz, e aos que se investiga como supostos autores dun delito de roubo. 

A Garda Civil indicou que o material aínda non foi recuperado, polo que a investigación continua aberta para pescudar o seu destino e a posible participación doutras persoas no roubo.  As dilixencias instruídas pola Garda Civil entregáronse no Xulgado de Instrución de garda de Redondela. 

Investigados dous veciños de Mondariz polo suposto roubo de 55...