1-0. O Barcelona gaña pero non convence

O Barcelona, tras dous empates na liga, reencontrouse coa vitoria ante un Valladolid sen pegada (1-0), nun partido gris no que o líder da competición non disipou as dúbidas a poucos días de disputar a ida dos oitavos de final da liga de Campións contra o Olympique de Lyon.

Un gol de penalti no primeiro tempo de Lionel Messi, que no 85 desaproveitou outra pena máxima, liquidou a papeleta para o equipo azulgrana, que no segundo tempo botou de menos a súa puntería habitual para sumar un resultado máis avultado.

Un día logo de asinar a renovación, apostou Ernesto Valverde por un equipo híbrido. Descansaron Rakitic e Luís Suárez e confiou en Kevin-Prince Boateng para que asumise o rol de dianteiro centro que habitualmente ocupa o uruguaio.

A súa aposta non acabou de callar. Xogaba Messi, tamén Dembélé, pero no primeiro tempo o Barça pareceuse ao de hai unha semana en San Mamés.

Sen fluidez na medular, con Vidal e Aleñá moi imprecisos, os locais apenas asustaron a Masip no primeiro tempo. O exportero azulgrana foi case un espectador máis nos primeiros 45 minutos.

A liña de cinco defensas que expuxo Sergio González incomodou ao Barça. Consciente de que nas últimas datas ao líder lle esta custando xerar xogo polas ás, o técnico do Valladolid taponou o xogo interior azulgrana co obxectivo de roubar balóns e lanzar transicións rápidas para o tridente ofensivo formado por Enes Ünal, Sergi Guardiola e Verde.

O Valladolid non xerou moito perigo a Ter Stegen, pero freaba o pouco desequilibrio azulgrana. Ante as poucas ideas dos seus compañeiros, só Messi e Dembélé buscaron, con máis corazón que xogo, a portería de Masip.

O primeiro disparo entre os tres paus asinouno Boateng, no minuto 9. E non foi ata o minuto 41 cando Messi volveu probalo coa destra. O seu intento rexeitouno a defensa valisoletana a córner.

Do posible 1-0, o Valladolid a punto estivo de tomar vantaxe. Nun contraataque con superioridade o centro de Verde non conectou con Ünal.

No rexeite o balón caeu a Piqué, quen iniciou outra contra que acabou con Míchel derrubando ao central catalán. A pesar das queixas dos xogadores do equipo blanquivioleta, o árbitro sinalou o punto dos once metros.

Messi, cun zurdazo raso e colocado ao poste esquerdo, superou por pouco a oposición de Masip (min.43) dando ao seu equipo unha vantaxe que, por xogo e ocasións, non mereceu.

Na continuación, o Valladolid non se amedrentou e deu un paso adiante en busca do empate. Valente aposta a de Sergio González que, a punto, estivo de ter premio con algunha transición rápida executada sen contundencia.

Pero o xogo do Barça mellorou un pouco. Con máis espazos e calma na medular, o equipo azulgrana gozou tamén de máis ocasións. O segundo evitouno Masip cunha man acrobática a canonazo de Messi desde a interior da área. O arxentino tivo unha segunda opción cun disparo desde o frontal tras asistencia de Dembélé que pasou preto dun poste.

No minuto 60, Valverde puxo fin ao debut en Liga de Prince Boateng. Entrou no seu lugar Suárez. No primeiro man a man, Masip, o heroe do Valladolid, gañoulle a partida.

A pesar das ocasións, o Barça non conseguía controlar o partido co balón e o duelo converteuse no máis parecido a un correcalles.

Na anarquía, multiplicáronse as chegadas do Barcelona, pero nin Aleñá, nunha contra, nin Suárez, nun remate que parecía franco a centro de Messi, nin Sergi Roberto acertaron.

O Valladolid non lle perdía a cara ao partido e, a pesar da lesión de Toni Vila, que apenas xogou seis minutos, mantivo viva a chama do partido.

Messi tivo a sentenza no 85 con outro penalti claro de Kiko Olivas a Coutinho. O arxentino repetiu o mesmo lanzamento do primeiro gol e, esta vez, o porteiro de Sabadell evitou o segundo.

O porteiro do Valladolid salvou outro man a man a Suárez no tempo engadido. A súa brillante actuación, con todo, non lle bastou ao seu equipo para empatar ante un Barcelona que afronta con dúbidas o tramo decisivo da tempada.