O líder de Vox e candidato á presidencia do Goberno por esta formación, Santiago Abascal, desprazarase o vindeiro luns até A Coruña para participar nun mitin.
Así o confirmaron a Europa Press fontes de Vox, que aseguraron que o líder do partido estará en Galicia para participar "polo menos" nun mitin que se celebrará pola tarde no Palacio de Congresos da Coruña.
A decisión de programar un mitin de Abascal en Galicia, comunidade que inicialmente non figuraba na súa axenda, prodúcese un día despois de que a Xunta Electoral Central deixase a Vox fóra do debate electoral organizado por Atresmedia, alegando que a súa presenza vulneraría os criterios de representatividade.
Ademais, vén reforzar a presenza dos cargos do partido en Galicia, despois da visita que a pasada fin de semana realizou a Vigo e Ourense a responsable de Vox en Madrid, Rocío Monasterio.