Phronima sedentaria. Ese é o nome da estraña criatura que foi achada recentemente na praia viguesa de Samil. Os responsables foron un home e o seu can e o achádego chegou aos biólogos do CSIC de Vigo, quen confirmaron que se trata deste anfípodo de curioso comportamento, pois usa o corpo doutro ser vivo para sobrevivir.
A esta criatura bautizárona xa como Alien, porque foi a que inspirou a Ridley Scott á hora de concibir o horripilante becho na película homónima.
Adoitan vivir a 1.000 metros de profundidade, de aí o excepcional do seu descubrimento, segundo explican os científicos a GCiencia. Os exemplares xa foron devoltos ao mar.