Dúas persoas de avanzada idade, unha muller e un home, faleceron este domingo por causas naturais cando se dirixían a votar.
A muller faleceu nun colexio electoral de Vélez de Benaudalla (Granada) ao que acudiu a exercer o seu dereito ao voto. Segundo informou a Delegación do Goberno en Andalucía, os feitos ocorreron ao redor das 10.30 horas no colexio electoral CEIP Madrigal e Padial, cando a muller, duns 80 anos, perdeu a consciencia.
Os servizos de emerxencias do 112 foron avisados, pero non puideron auxiliala, xa que a anciá faleceu tras o desmaio.
O home, de 77 anos, morreu nun colexio electoral da localidade guipuscoana de Urretxu, recinto que permaneceu pechado durante algo máis de dúas horas.
Segundo informou a EFE a Xunta Electoral de Zona de Bergara e a Garda Municipal de Urretxu, o suceso tivo lugar cara ás 12.00 horas na casa de cultura situada na rúa Jáuregi, fronte ao Concello desta pequena localidade da comarca do Alto Urola.
O home atopábase, xunto á súa esposa, no interior do colexio electoral cando comezou a sentirse mal, polo que se optou por chamar a unha ambulancia. Desprazados ao lugar, os sanitarios de emerxencia practicaron ao home manobras de reanimación pero non puideron salvalo do presunto infarto que padecía, precisaron as mesmas fontes.
Axentes da policía local e da Ertzaintza acudiron tamén ao colexio electoral da casa de cultura, cuxas tres mesas permaneceron pechadas até as 14.15 horas, durante o tempo que durou a asistencia sanitaria de urxencia, a chegada doutros familiares do ancián e a retirada do corpo por parte do persoal dunha funeraria.
