O número de persoas cunha alimentación baseada en vexetais, xa sexan vexetarianas ou veganas, aumentou en Galicia un 6000 % nos últimos dez anos, segundo os datos do estudo encargado pola Fundación Franz Weber e pola Asociación Animalista Libera.
Esta enquisa indica que o 8 % do milleiro de galegos consultados defínense como vexetarianos ou veganos, unha cifra amplamente superior á de sondaxes anteriores que deixaban esta estatística nun 1,5 % da poboación total.
Segundo os cálculos efectuados por estas asociacións o número total de persoas vexetarianas ou veganas en Galicia podería alcanzar as 200.000, aínda que en termos relativos esta comunidade aínda estea por baixo da media estatal, onde é unha característica de case do 10 % da poboación.
Desde a Fundación Franz Weber e Libera asocian este crecemento a unha "maior preocupación pola protección dos animais" e por evitar o seu sufrimento en industrias como a cárnica ou a láctea, con gran arraigamento e presenza en Galicia.
Por todo iso, ambas as organizacións demandan ás Administracións "respostas adecuadas ao que xa é unha crecente realidade social" e que se tomen medidas como as xa adoptadas en Chile ou Portugal de garantir por lei o acceso nos comedores escolares a menús completamente vexetais nos centros educativos públicos e concertados.
