Durante a xornada deste venres a comunidade galega verá un aumento das temperaturas con crecemento da inestabilidade no interior, en especial nas zonas montañosas de Lugo e Ourense, segundo a predición de Meteogalicia.
As altas presións continuarán estacionarias sobre as Illas Británicas, achegando aire cálido desde o sur, o que fará que aumente a inestabilidade no interior.
Deste xeito, o ceo estará pouco nubrado ou despexado durante a mañá, con nubes de estancamento no litoral cantábrico; xa pola tarde haberá nubes de evolución no interior, que deixarán algún chuvasco tormentoso, máis probable nas zonas de montaña de Lugo e Ourense.
As temperaturas experimentarán un lixeiro ascenso, polo que a sensación será de calor na metade sur.
Os ventos soprarán frouxos de compoñente norte durante a mañá, aumentando a moderados pola tarde.