Deporte General

A cadea Sky Sports suspende a Carragher por cuspir a unha nena

O exfubolista inglés do Liverpool Jamie Carragher foi suspendido ata final de tempada pola cadea británica Sky Sports, onde traballaba como comentarista e colaborador, despois de filtrarse un vídeo no que aparece cuspindo a unha nena durante unha lea cun afeccionado.

O domingo, un día despois da vitoria do Manchester United sobre o Liverpool (2-1), un afeccionado increpou a Carragher desde o seu automóbil e lembroulle a derrota do seu exequipo en Old Trafford mentres o gravaba co seu teléfono móbil. Segundo se aprecia no vídeo, o antigo internacional inglés respondeu á provocación cun cuspiñazo que, debido ao vento, saíu dirixido cara á cara da nena, de 14 anos, que estaba sentada no asento do copiloto.

Carragher desculpouse publicamente polo seu comportamento a través da súa conta de Twitter e dixo que a súa reacción "non ten perdón". TEXTO: EFE

Comentarios