Case trescentas persoas poderán seguir o acto de apertura da Porta Santa da Catedral de Santiago desde a Praza da Quintana o próximo día 31 de decembro.
Diso deu conta este luns o alcalde de Santiago, Xosé Sánchez Bugallo, que explicou que o acceso será con invitación previa. Quen desexe acudir terá que retirar a entrada no despacho de billetes do Teatro Principal desde este martes 22 de decembro ata o martes 29, exceptuando o domingo 27, que estará pechada.
Cada persoa poderá recoller dúas entradas, achegando o DNI das persoas que acudirán o día 31 á praza da Quintana. Para acceder á praza, os asistentes terán que cumprir coas medidas de prevención hixiénico-sanitarias como o uso de máscara, distancia interpersoal e hixiene de mans.
Desde o Concello, recomendan a non asistencia a persoas maiores de 75 anos, persoas vulnerables á covid-19 e aquelas que presenten algún tipo de enfermidade ou dificultade respiratoria que se poida ver agravada polo uso da máscara, ou que presenten algunha alteración que faga inviable a súa utilización.
O seguimento desde a propia Catedral tamén será restrinxido, e seguindo as recomendacións sanitarias, establecerase un aforamento limitado, de maneira que no interior da basílica só poderán estar un grupo de autoridades e unha representación da Diocese de Santiago.
Ademais, no claustro da Catedral habilitaranse setenta asentos para poder seguir a cerimonia a través dunha pantalla.
