Imprimir

Centos de persoas marchan nas Pontes contra os recortes anunciados por Endesa

Efe | 11 de enero de 2019

Saíron desde a Praza do Hospital para reclamar que non se deixe "morrer o paraugas que nos protexe"

Traballadores da central térmica de Endesa nas Pontes mobilizáronse este venres en defensa de avances na negociación dun novo convenio colectivo tras ser denunciado o anterior pola compañía, e pediron que non se deixe "morrer o paraugas que nos protexe a todos".  O presidente do comité de empresa da factoría, Luis Varela, declarou que a firma convocou no "último ano e medio 48 reunións" que non pasaron de ser unha "escenificación". "Tivéronnos conxelados un ano", estimou.

Ao seu xuízo, a defensa dos "dereitos adquiridos" nas últimas décadas provoca que estean "abocados" a mobilizarse. Deste xeito, manifestáronse polas rúas da vila, con inicio na praza do Hospital e final nas inmediacións do propio complexo eléctrico. Segundo o representante sindical, é momento de "salvagardar" as súas condicións tras "vinte convenios" e alertou dun claro "recorte, están a meternos a man no peto".

Varela asegurou que ninguén "ten a verdade absoluta", pero considerou que deben "intervir moitos" axentes para resolver o conflito, caso da contorna política. Na súa opinión, o conflito está "provocado pola reforma laboral de 2012", para recordar que por encima do seu convenio "non temos referencia" á cal adherirse. Igualmente, subliñou que esta problemática tamén afecta ao amplo colectivo de pasivos, caso de xubilados ou orfos, que carecen de relación "contractual".

Segundo o presidente do órgano sindical, a cidadanía das Pontes está a vivir "con rabia" esta situación. "Este pobo foi moi partícipe con Endesa, é un prexuízo para toda a comarca", sostivo. 

Ao solicitar apoio dos partidos políticos, apuntou que os afectados están "satisfeitos" grazas a medidas como unha declaración institucional aprobada no Concello, pero reiterou que unha "empresa deste tipo non pode xogar deste xeito" nin tampouco se pode "gobernar sen convenio".

Puede ver este artículo en la siguitente dirección /articulo/galicia/centos-persoas-marchan-nas-pontes-recortes-sociais-anunciados-endesa/20190111115416050224.html


© 2019 Galiciae

Fernando de Casa Novoa, 35 A 1ºB Santiago de Compostela

Tlfno: 981 55 25 30

(Grupo El Progreso)