Condenan a Sito Miñanco a catro anos de cárcere por branqueo de capitais

A Audiencia de Pontevedra impuxo a mesma pena de prisión e multa á súa primeira esposa, a unha das súas fillas, á súa excuñada e a un empresario, procesados na mesma causa

Sito Miñanco, durante o xuízo. JAVIER CERVERA-MERCADILLO
photo_camera Sito Miñanco, durante o xuízo. JAVIER CERVERA-MERCADILLO

A Audiencia de Pontevedra condenou a catro anos de cárcere e a unha multa de seis millóns de euros ao narcotraficante galego José Ramón Prado Bugallo, coñecido como Sito Miñanco, como autor dun delito de branqueo de capitais procedentes do tráfico de drogas. 

A sentenza considera probado que branqueou diñeiro da droga, entre 1988 e 2007, mediante a adquisición de bens inmobles a través da inmobiliaria San Saturnino.

O tribunal impuxo a mesma pena de prisión e idéntica multa aos outros catro acusados, María Rosa Pouso Navazas, Rosa María Prado Pouso e Josefa Pouso Navazas, a súa primeira esposa, a súa filla maior e a súa excuñada, respectivamente; e para José Alberto Aguín Magdalena, un empresario que, segundo a acusación, actuaba como testaferro do narcotraficante.

Ademais, a Audiencia de Pontevedra acordou a clausura definitiva da sociedade inmobiliaria, ao ser o "eixe" ao redor do cal todos os acusados branquearon diñeiro do narcotráfico, decretando o decomiso da totalidade de bens adquiridos.

A Fiscalía solicitaba inicialmente para Miñanco e o seu círculo familiar máis próximo unha pena de seis anos de prisión e o pago dunha multa de dez millóns de euros.

Os maxistrados da Audiencia de Pontevedra consideran acreditado na sentenza que "sen distincións entre eles" todos os acusados participaron "activamente" e de forma "fundamental" no proceso para lavar o diñeiro que procedía do narcotráfico.

A Audiencia destaca á hora de fixar a pena o volume de diñeiro branqueado, así como os negocios "que levantaron, que sostiveron e que aínda teñen", ou a cantidade de sociedades que formaron "para ocultar ou, cando menos, maquillar" a procedencia do diñeiro.

O tribunal sinala que o coñecemento que tiñan os sospeitosos da procedencia delituosa do diñeiro dedúcese "dunha forma ben fácil" do incremento patrimonial, "notorio e desproporcionado", que os acusados "non puideron xustificar" cos seus ingresos legais.

A orixe do diñeiro co que adquiriron numerosas propiedades na provincia de Pontevedra, segundo a sentenza, "só se explica" pola relación de todos eles coas actividades delituosas de Sito Miñanco.

A sentenza explica que Sito Miñanco e José Alberto Aguín Magdalena "coñecían perfectamente" que o diñeiro empregado para a adquisición das propiedades da inmobiliaria procedía, "e ata eles mesmos o obtiveron", das súas actividades delituosas.

As outras tres acusadas, pola súa banda, non só pola súa relación familiar con Miñanco, "non podían ignorar" senón que "sabían dabondo" a orixe dese diñeiro, segundo engade o tribunal, que advirte das "mañas" empregadas por todos para "disimular" a súa actividade a través de compraventas, préstamos, hipotecas ou sociedades instrumentais.

Ademais, os xuíces subliñan en base á documentación aportada no xuízo e as declaracións dos peritos da Axencia Tributaria que os ingresos lícitos dos imputados "non lles daban" para manexar "tan inxentes cantidades de diñeiro". 

Comentarios