Cs decidiu separase do grupo municipal do Concello de Barcelona que lidera o exprimer ministro francés Manuel Valls e seguirá pola súa conta "e con voz propia" cos seus tres concelleiros.
Unha medida que adoptou a Executiva do partido, explicou a portavoz, Inés Arrimadas, nunha rolda de prensa na sede de Alcalá, despois de que Valls decidise apoiar a continuidade de Ada Colau como alcaldesa de Barcelona para cortar o paso ao candidato de ERC, Ernest Maragall.
A pinga que colmou o vaso, explicou, foi o apoio de Valls á investidura de Colau como alcaldesa xunto aos outros dous edís independentes da lista Barcelona pel Canvi-Cs, o exsocialista Celestino Corbacho e Eva Perera.
Valls, a quen o secretario xeral de Cs, José Manuel Villegas, comunicou esta ruptura despois da reunión da Executiva, seguiu adiante coa súa decisión de apoiar a Colau sen condicións, como mal menor, a pesar de coñecer a desconformidade do partido laranxa.
"Tiñamos razón: a diferenza entre Maragall e Colau é moi pouca e xa se viu porque a súa primeira decisión foi volver pór o lazo amarelo na fachada do concello", subliñou Arrimadas, utilizando este espazo como "taboleiro de anuncios do separatismo".
Os outros tres edís da lista, Francisco Sierra, Marilen Barceló e María Luz Guilarte, formarán grupo propio no Consistorio barcelonés.
Pouco máis dun ano durou a relación de Cs con Valls, unha relación marcada polo distanciamento do exprimeiro ministro francés co posicionamento do partido sobre Vox, que non gustaba nada ao aspirante apoiado por Cs e que publicamente o manifestou.
De feito, o líder da formación, Albert Rivera, non fixo campaña en favor de Valls en ningún momento e tampouco compartiron ningún acto durante os xenerais.
Cs, sinalou Arrimadas, nunca negou as "discrepancias" con Valls, pero isto foi "unha discrepancia moi importante nunha cuestión moi importante".
Cs rompe con Valls no Concello de Barcelona
A formación tomou a decisión despois de que o exprimeiro ministro francés apoiase a continuidade de Ada Colau como alcaldesa