Un equipo de investigadores de Sputnik Labrego e a empresa Ronsel Arqueoloxía e Patrimonio SL descubriron un dos conxuntos pictóricos máis importantes do noroeste peninsular, un achado que conta co visto e prace da Dirección Xeral de Patrimonio Cultural, que confirmou a importancia do achado.
Nun comunicado, este equipo destacou a localización de polo "menos quince estampas" de distinta clase, que foron avaladas desde a Dirección Xeral de Patrimonio Cultural, e non descartan a posibilidade de achar novos exemplos deste tipo de arte no lugar.
"Durante o proceso de documentación dun chozo da guerrilla antifranquista situado nunha cavidade, observamos unhas pinturas que enseguida asociamos a momentos prehistóricos", apuntou Francisco Alonso, da empresa Ronsel Arqueoloxía e Patrimonio S.L.
Segundo explica, "nas primeiras visitas" localizaron polo menos "unha quincena de pinturas de diferentes tipos, desde soliformes ata o fantástico ídolo oculado, o primeiro documentado en Galicia".
Este descubrimento enmárcase dentro da análise arqueolóxica da guerrilla antifranquista e da minería do wolframio en Casaio, proxecto que levan da man Carlos Tejerizo, do Instituto de Ciencias do Patrimonio (CSIC), e Alejandro Rodríguez, da Universidade de Santiago de Compostela.
"Para todos nós é un momento moi especial pola súa importancia, anímanos a seguir os traballos en Casaio", en Carballeda de Valdeorras, abundou o equipo.
De forma paralela, Sputnik Labrego xa iniciou unha proposta para documentar as pinturas e continuar observando a zona en busca de novos achados e "todo parece indicar que non se trata do único conxunto presente na paisaxe", apuntou Tejerizo.