Detido no sur de Pontevedra por supostos abusos sexuais ao seu sobriño de 6 anos

Foi a nai do menor quen denunciou que o seu fillo era obxecto de tocamentos obscenos por parte do arrestado

A Garda Civil detivo no sur da provincia de Pontevedra un home de 39 anos como suposto autor dun delito de abusos sexuais sobre o seu sobriño, de 6 anos, informaron fontes do instituto armado.

Foi a nai do menor quen denunciou ante a Garda Civil que o seu fillo era obxecto de tocamentos obscenos por parte do seu tío político, que era o familiar encargado de recollelo para visitar á súa familia paterna, tendo en conta de que os seus pais estaban separados e en trámite de divorcio.

As sospeitas xurdiron cando, tempo atrás, o neno fíxolle saber a súa nai que prefería que o fora a recoller a súa tía.

Esta circunstancia e o relato pormenorizado que lle fixo o neno á súa nai de, polo menos, dúas agresións sexuais sufridas en datas recentes foron determinantes para que puxese os feitos en coñecemento da Garda Civil.

As investigacións realizadas polo equipo Muller-Menor, integrado no equipo de Policía Xudicial da Garda Civil de Tui, concluíron coa detención do tío do menor como suposto autor dun delito de abusos sexuais.

Por mor da detención procedeuse ao rexistro do seu domicilio e do seu coche, onde se recolleron algúns efectos, que foron remitidos aos peritos correspondentes para a súa análise e valoración.

O detido foi posto a disposición do Xulgado de Instrución número 2 de Ponteareas, que decretou a súa liberdade provisional con medidas cautelares de prohibición de comunicación e afastamento tanto do menor como dos seus propios fillos.