O presidente de Abanca, Juan Carlos Escotet, apostou por Portugal como "unha oportunidade" para reactivar o sector exterior galego, e recordou que o país veciño é un mercado que mostra "gran dinamismo".
Así o trasladou durante a súa intervención nun xantar coloquio organizado polo Círculo de Empresarios de Galicia, no que participaron máis dun centenar de empresarios e directivos, e no que Escotet fixo un repaso da situación económica global, española e galega.
O presidente da entidade financeira lembrou a estreita relación de Galicia e Portugal, que "é o segundo destino receptor das exportacións galegas". "Ademais, a súa economía avanza de forma robusta, a súa prima de risco redúcese a mínimos históricos e presenta oportunidades de crecemento e complementariedade con Galicia", engadiu.
A este respecto, referiuse ás adquisicións de Deutsche Bank PCB Portugal, xa integrada, e de Banco Caixa Geral España, actualmente en proceso de integración. "Estas operacións, que nos achegan 13.500 millóns de euros en volume de negocio, permitirannos ofrecer ao mercado unha resposta integral de servizos financeiros 'cros-border' e consolidarán a nosa posición ibérica", engadiu.
Por outra banda, Juan Carlos Escotet proclamou unha vez máis a vontade de Abanca de seguir "sendo referencia" para as empresas en concesións de crédito, e sinalou que, en 2018, a entidade formalizou máis de 2.000 millóns de euros en novas operacións con pemes e autónomos, o dobre que o ano anterior.
