Estrella Galicia instala na súa fábrica da Coruña case 1.000 paneis solares

Con esta medida producirá e consumirá a súa propia enerxía
Generated by  IJG JPEG Library

Estrella Galicia instalou na cuberta da súa fábrica da Coruña case mil paneis solares para producir e consumir a súa propia enerxía, segundo informa a compañía cervexeira. A planta fotovoltaica conta cunha potencia de 415,4 kWp e ocupa unha superficie total de 8.000 metros cadrados.

A produción anual estimada dos paneis solares, que captarán a enerxía do sol e transformarana en electricidade, é de 615.953 kWh, o equivalente ao consumo medio anual de preto de 200 fogares, o que supón o 2,5% do consumo da fábrica de Estrella Galicia.

A empresa reducirá así o seu volume de emisións de CO2 á atmosfera en case 200 toneladas, co que diminúe a súa pegada de carbono, concretamente as emisións indirectas ou de alcance 2, que son as derivadas do consumo de electricidade da rede, o que terá un efecto positivo na calidade do aire similar ao que xerarían 20.942 árbores.

Coa instalación fotovoltaica, Estrella Galicia reforza a súa compromiso ambiental ao asumir os retos da transición enerxética, loitando contra o cambio climático mediante o uso dunha enerxía limpa e non contaminante, indicou a empresa.

Xa en 2019, Hijos de Rivera demandou a garantía de orixe de toda a enerxía consumida co obxectivo de acreditar que procedía de fontes renovables e o seu propósito é continuar acometendo investimentos que lle permitan seguir avanzando neste sentido.

A posta en marcha desta instalación enerxética de autoconsumo de orixe renovable encargouse á compañía galega EDF Solar, especializada en sistemas de autoconsumo para empresas. Trátase dun proxecto chave en man que inclúe a enxeñería, a elaboración da documentación necesaria e trámites administrativos, a execución, posta en marcha da instalación e o sistema de monitorización.

Comentarios