Un gandeiro moi coñecido en Mondoñedo, que viviu toda a vida na parroquia de Argomoso, onde tiña unha explotación gandeira, sufriu este sábado un accidente co tractor que manexaba e co que se precipitou por unha pendente pronunciada. O vehículo envorcou e el, que quedou debaixo, faleceu, segundo todos os indicios, por esmagamento.
Segundo as primeiras informacións solicitadas por este xornal, os seus pais, que viven moi preto, así como a súa esposa que ao parecer atopábase moi próxima ao lugar do accidente, e numerosos familiares e amigos, achegáronse á zona, moi conmocionados, en canto se soubo o ocorrido.
Os efectivos de Protección Civil foron ao parecer os primeiros en chegar ao lugar e pronto chegaron tamén os médicos e responsables sanitarios que certificaron o óbito. Con todo, foi necesario esperar varias horas ata a chegada das autoridades xudiciais que debían ordenar o levantamento do cadáver e o seu traslado a Lugo para ser sometido a unha autopsia, tal como se procede nestes casos.
Para facilitarlle o labor de chegada aos bombeiros de Barreiros, un veciño de Lindín e bo amigo da familia, indicoulles como chegar, de forma que a resposta dos corpos e forzas de seguridade foi rápida.
