Imprimir

Feijóo anuncia novas incorporacións de sanitarios e compras de material

Agencias | 26 de marzo de 2020

Sesión deste xoves no Parlamento de Galicia. EP
Sesión deste xoves no Parlamento de Galicia. EP
A Xunta prevé sumar 167 facultativos e enfermeiros aos 191 residentes xa autorizados e contratacións de equipamento por 7 millóns de euros. Apraza o cobro de algúns impostos autonómicos

O presidente da Xunta, Alberto Núñez Feijóo, avanzou este xoves que o Goberno galego aprobará este venres a compra de máis material, a contratación de máis persoal sanitario e outras medidas, entre elas, a suspensión do cobro dalgúns impostos para loitar contra o coronavirus e paliar as súas consecuencias.

Así, nunha intervención ante a deputación permanente do Parlamento galego, anunciou que se publicará nos próximos días unha nova orde para ampliar os contratos de 145 facultativos máis (médicos, farmacéuticos, psicólogos e radiofísicos), ademais de 22 enfermeiros. Sumaranse aos 191 profesionais residentes xa autorizados previamente, que están no seu último ano de formación. "Entre os dous procesos estamos a falar dun total de 358 profesionais, que se suman aos máis de 39.000 que xa ten o Sergas", explicou.

O presidente da Xunta insistiu en que "o peor desde o punto de vista asistencial, nas Ucis, está por chegar". "Veñen semanas moi duras no ámbito sanitario", advertiu, á vez que recoñeceu que o confinamento "deu os seus froitos".  

O popular pide ás forzas políticas "estar á altura" dunha situación "sen precedentes"

Ante esta situación, o material segue sendo unha preocupación, polo que se autorizarán novas contratacións por 7 millóns de euros. Máscaras, luvas, batas e tests de extracción e diagnóstico "todos os que se poidan conseguir".

Neste punto, Feijóo asegurou comprender as dificultades do Ministerio de Sanidade, ao que mostrou a súa "lealdade", para facerse con material e distribuílo, pero subliñou que "ver que non acaba de chegar e que o que chega é escaso acrecenta a preocupación que comparten os profesionais".

Feijóo tamén detallou que a Xunta aprobará este venres a suspensión de prazos de presentación do Imposto de Transmisións Patrimoniais, de Sucesións e tributos do xogo. Non terán que ser presentadas ata o 30 de xuño e, en caso de extensión do estado de alarma, ata un mes despois de que se levante.

Esta medida favorecerá a 32.000 persoas, segundo os cálculos da Xunta, que tamén aprobará un plan específico para dar liquidez á súa propia tesourería e atender pagos, sobre todo a provedores, e profundará nas medidas económicas xa avanzadas, como os préstamos a autónomos e pemes. 

GRUPOS. Na sesión parlamentaria, que comezou cun minuto de silencio en memoria das persoas falecidas e como mostra de solidariedade con todos os afectados, o popular pediu ao conxunto das forzas políticas "estar á altura" da situación "sen precedentes" xerada polo coronavirus e dirixiu unha mensaxe para o conxunto da sociedade e en especial para os maiores: "Non estades sós", "volverán os días bos".

 

A oposición levanta a voz contra os "recortes"

O secretario xeral do PSdeG, Gonzalo Caballaro, pediu no Parlamento que a "acción pública" sirva de escudo "de protección" a todos os galegos vulnerables. "Non van ser as grandes empresas, os grandes poderes, non van ser os grandes relatos os que van dar unha saída. A saída desta situación están a dala o persoal sanitario e os traballadores do común", subliñou.

O socialista subliñou que unha das leccións que haberá que aprender desta situación é a "importancia de fortalecer o estado do benestar" e, despois de que Feijóo reivindicase a anticipación de Galicia ao decretar a declaración de urxencia sanitaria, asegurou ter que "lamentar" que isto "non foi así".

Común da Esquerda
O portavoz do Grupo Común da Esquerda, Antón Sánchez, reclamou ao presidente da Xunta elaborar uns novos orzamentos autonómicos tras a crise sanitaria e esixiulle que explique as doazóns de material sanitario a Madrid nun momento no que o propio Goberno autonómico está a reclamar ao Executivo central que o envíe a Galicia e que os sanitarios tamén acusan a súa falta.

Sánchez, que mostrou o seu "orgullo e admiración" cara aos traballadores sanitarios e de servizos sociais e esenciais, subliñou que hai que loitar contra a pandemia e contra "os recortes dos últimos anos en sanidade".

Bloque
A portavoz nacional do BNG, Ana Pontón, reivindicou ante Feijóo a necesidade de gobernos capaces de anticiparse aos problemas como o derivado da pandemia do coronavirus e propuxo a posta en marcha dunha mesa económica e social na que os axentes sociais e os partidos políticos "encaren o futuro".

A nacionalista fixo fincapé na necesidade de tomar medidas como o peche dos focos de contaxio, "blindar" Galicia e parar toda a actividade económica non esencial. Avanzou, ademais, que unha vez superada a crise o BNG pedirá que se reactive a comisión de investigación sobre a situación da sanidade pública galega.

Grupo mixto
Davide Rodríguez, do grupo mixto, coincidiu co resto en asegurar estar á beira do Goberno galego nas cuestións que merezan ser apoiadas, aínda que incidiu no "desmantelamento" do servizo publico de saúde. "Levamos moitos anos retrocedendo, non adiantándonos", concluíu.

Puede ver este artículo en la siguitente dirección /articulo/galicia/feijoo-anuncia-incorporacion-mais-profesionais-sanitarios-compras-material/20200326144708075633.html


© 2020 Galiciae

Fernando de Casa Novoa, 35 A 1ºB Santiago de Compostela

Tlfno: 981 55 25 30

(Grupo El Progreso)