Galicia inicia a fin de semana coas temperaturas mínimas en descenso

Galicia inicia a fin de semana baixo a influencia dun anticiclón que trae unha xornada de nubes e claros coas temperaturas mínimas en descenso en boa parte da comunidade. As previsións de Meteogalicia localizan en Lugo a máis baixa do mapa urbano, con cero graos, fronte aos cinco deste venres.

No que respecta ás máximas, moveranse entre os 11 graos de Lugo e Santiago e os 16 de Pontevedra.

Cos termómetros nese nivel, o ceo estará parcialmente cuberto na metade oeste e máis despexado no leste de Lugo e Ourense. O vento, mentres, será frouxo do suroeste en xeral, aínda que soprará forte entre a Costa da Morte e Estaca de Bares durante a tarde.