Imprimir

O Goberno prevé subir o Ive ás bebidas azucradas do 10 ao 21%

Axencias | 16 de octubre de 2020

Latas de bebida. SKEEZE (PIXABAY)
Latas de bebida. SKEEZE (PIXABAY)
Aspira a elevar a recadación en 7.000 millóns cos novos impostos e a lei antifraude

O Goberno comunicou este xoves á Comisión Europea a súa intención de subir o Ive das bebidas azucradas e edulcoradas do 10 ao 21%. A medida está incluída no plan orzamentario que o Executivo enviou a Bruxelas coas liñas xerais das contas para 2021, que aínda non presentou. A idea do equipo de Pedro Sánchez é elevar así a carga fiscal sobre produtos prexudiciais para a saúde dos consumidores á vez que obtén ingresos para as arcas do Estado, moi tocadas polo impacto da pandemia. 

Esta medida forma parte dos cambios que o Goberno pretende imprimir no sistema tributario español, co obxectivo de elevar a recadación vía impostos en preto de 6.000 millóns de euros anuais. Entre as novas figuras que se aplicarán destacan as taxas Google (sobre determinados servizos dixitais) e Tobin (o imposto ás transaccións financeiras), aprobadas xa no Parlamento.

Tamén figuran no paquete fiscal medidas no plano ambiental, como a creación dun gravame sobre os envases de plástico dun uso, que xa superou o trámite de información pública. O Consello de Ministros aprobarao previsiblemente nas próximas semanas para remitilo ao Parlamento. 

O Executivo promete ante Bruxelas alcanzar o próximo ano uns ingresos históricos de 495.000 millóns

A medida descoñecida ata agora é esa suba do Ive para as bebidas azucradas para "favorecer hábitos máis saudables". Xa o anterior ministro de Facenda no Goberno de Mariano Rajoy, Cristóbal Montoro, tratou de penalizar máis fiscalmente o seu consumo. A decisión afecta máis ás familias con rendas baixas e con fillos, que son aquelas que destinan maior porcentaxe dos seus ingresos a comprar este tipo de produtos. 

Coas novidades tributarias e a lei para loitar contra a fraude fiscal que ultima, o Goberno prevé recadar 6.847 millóns adicionais. Entre as subas impositivas e o efecto do crecemento económico, o Executivo promete elevar os ingresos en máis de 33.400 millóns o próximo ano e alcanzar un nivel histórico de 495.000 millóns, cos que recortar o déficit público e afrontar novas partidas de gasto como a subida das pensións nun 0,9%. 

O plan orzamentario recolle ademais o aumento gradual do permiso de paternidade de 12 a 16 semanas, o que permitirá a súa equiparación cos de maternidade. "Supón un avance máis cara á igualdade real", destaca o Goberno no documento remitido ao Executivo comunitario, resaltando que por primeira vez os pais e as nais terán dereito ás mesmas semanas de permiso. 

Puede ver este artículo en la siguitente dirección /articulo/economia/goberno-preve-subir-ive-bebidas-azucradas-do-10-ao-21/20201016011752085927.html


© 2020 Galiciae

Fernando de Casa Novoa, 35 A 1ºB Santiago de Compostela

Tlfno: 981 55 25 30

(Grupo El Progreso)