As 50 organizacións territoriais que forman Hostalería de España acordaron este martes a creación dunha comisión xurídica interritorial que estude accións legais, ante a entrada en vigor das novas medidas sanitarias.
Esta comisión analizará a interposición, de xeito coordinado, de recursos en cada comunidade autónoma, xa que a transposición da norma aprobada polo Ministerio de Sanidade corresponde a cada unha das autonomías.
Ante o aumento de contaxios por Covid-19, o Ministerio de Sanidade e os Executivos rexionais acordaron o venres pasado unha serie de medidas, entre elas prohibir as mesas con máis de dez comensais nos restaurantes, unha restrición que xa estaba vixente nalgunhas autonomías pero que agora se fai extensiva a todas. Para Hostalería de España, trátase de medidas "non xustificadas, sen unha medición do impacto e discriminatorias respecto doutros sectores".
A patronal criticou nun comunicado que as restricións "en ningún momento se acompañan de medidas compensatorias e de apoio a un sector moi danado" pola crise derivada da pandemia.
Tamén anunciou concentracións en diferentes zonas do territorio para reflectir o "tremendo malestar" que existe entre os empresarios e traballadores da hostalería, un sector que se está "criminalizando" a pesar de que intenta manter os 1,7 millóns de empregos que xera e que actuou "con responsabilidade", indicou o presidente de Hostalería, José Luís Yzuel.
Os próximos días 21 e 22 están convocadas concentracións en provincias de Castela e León, como Valladolid, Salamanca, León, Zamora e Palencia, así como unha manifestación o 23 de agosto na localidade alacantina de Benidorm, segundo a nota.
