O Servizo de Protección da Natureza (Seprona) da Garda Civil está a investigar a un veciño de Vigo como suposto autor dun delito contra a flora e a fauna por posuír ilegalmente 15 exemplares disecados de aves silvestres e varias cabezas de león, tigre, oso e puma, así como a cornamenta de varios antílopes.
Entre os animais incautados tamén se localizou un exemplar de azor, especie en réxime de protección especial.
Os exemplares foron intervidos por carecer das preceptivas autorizacións e certificacións que acreditasen a súa legal tenencia e procedencia.
Todos os animais intervidos quedaron depositados a disposición xudicial nas dependencias do Seprona da Garda Civil de Vigo.
O propietario foi investigado como presunto autor dun delito contra a flora e a fauna silvestre, ao mesmo tempo que se lle formulou unha denuncia administrativa por unha posible infracción de contrabando.
