Italia converteuse este xoves no país con maior número de mortos polo novo coronavirus ao contabilizar xa máis de 3.400 falecidos, cifra que supera os 3.245 rexistrados en China, onde se orixinou a pandemia.
Atendendo ao último balance oficial, dado a coñecer polo xefe de Protección Civil, Angelo Borrelli, ata o momento contabilizáronse 41.035 casos en Italia, unha cifra que equivale a algo menos da metade dos 80.928 casos do xigante asiático.
Nas últimas 24 horas rexistráronse en toda Italia 4.480 novos casos, mentres que a cifra de mortos aumentou en 427. Por outra banda, segundo Borrelli, recuperáronse outros 415 pacientes, polo que o total dos que superaron a enfermidade ascenden xa a 4.440.
Do total de casos positivos, hai 2.249 pacientes ingresados en coidados intensivos, 15.757 hospitalizados e outros 14.935 en illamento nos seus domicilios.
Como en días anteriores, Lombardía segue sendo a rexión máis afectada, con 19.884 casos e 2.168 falecidos, seguida por Emilia Romaña con 5.214 casos (689 máis) e 531 mortos, e Véneto, con 3.484 casos (270 máis) e 115 falecidos.
"Neste momento non é razoable dicir máis pero está claro que os procedementos que impulsamos, xa sexa o peche de actividades comerciais ou o relacionado coas escolas, terán que ser prorrogados cando conclúan", explicou o xefe do Goberno italiano, nunha entrevista concedida ao diario Il Correr della Sera.
Conte fixo fincapé en que o Goberno italiano evitou "o colapso do sistema". "As medidas restritivas están a funcionar e é obvio que cando alcancemos un pico, os contaxios comezarán a decrecer, polo menos en porcentaxe. Esperamos que nuns días non poderemos volver rápido á vida de antes", sinalou.
As rexións piden medidas máis restritivas
Os presidentes das rexións máis afectadas, con todo, confían en que o Goberno vaia máis aló. Así as cousas, o presidente de Lombardía, Attilio Fontana, reclamou este xoves medidas máis estritas. "Non hai que esperar máis. Hai que tomar decisións que xa foron suxeridas por quen viviu esta experiencia e conseguiu vencer o virus", sostivo, precisando que ten previsto falar co primeiro ministro, Giuseppe Conte, para ver "que se pode facer no menor tempo posible".
Pola súa banda, o presidente de Véneto, Luca Zaia, lamentou ter que ofrecer un "parte de guerra" todos os días cos cidadáns que morreron e que os cidadáns sigan sen cumprir coa petición de quedar en casa. "Se os vénetos non se meten na cabeza o quedar en casa a final de mes teremos overbooking en coidados intensivos", advertiu.
Neste sentido, confiou en que se adopten "medidas máis restritivas respecto dos paseos", xa que por agora as imaxes que hai non concordan con quedar "en casa e ter prudencia".
