O presidente da Federación Galega de Comercio, José María Seijas, opina que o "Black Friday", un "movemento que se instalou" desde hai uns anos, "vén a desmontar a campaña de Nadal do comercio local", que é a máis importante en vendas do ano.
En declaracións a EFE, Seijas recoñece que "a xente non ten présa por comprar", como o demostra o feito de que "está a subir o aforro", pero ante os descontos que inclúen as promocións do Black Friday, previsiblemente adiantarán parte das compras de Nadal.
Sucede, explica Seijas, que "o que se vende agora, non se volverá a vender" e, ademais, neste momento "cuns descontos que o comercio" local "non pode asumir" e menos na actual situación de crise.
Desde o seu punto de vista, trátase dunha campaña "totalmente contraproducente para a boa marcha do comercio".
"Non me cabe dúbida, vén a desmontar a campaña de Nadal", insiste.
