Unha nena de 2 anos que era retida polo seu pai cun coitelo de grandes dimensións nun domicilio de Orihuela (Alacante) foi rescatada ilesa por varios axentes da Policía Nacional.
Fontes da investigación informaron a Efe de que a parella sentimental e nai da nena avisou ao 112 de que era obxecto dun episodio de violencia machista e de que o pai retiña a pequena no domicilio coa ameaza do coitelo.
Tres axentes dun total de seis que acudiron ao lugar resultaron feridos durante a detención, un deles cunha lesión leve no ollo esquerdo, mentres que o arrestado presentou contusións de pouca consideración e foi ingresado nos calabozos por un presunto delito de violencia de xénero e lesións a axente da autoridade.
A chamada da muller produciuse ás 7.26 horas e ao chegar a primeira patrulla viron ao home, un español de 37 anos visiblemente nervioso e alterado, que agarraba dunha man á filla e coa outra portaba un coitelo grande.
Os axentes intentaron convencer ao home de que depuxese a súa actitude pero finalmente tiveron que intervir, sen disparo algún, para reducilo.
A nena non sufriu feridas e dos tres policías, ademais do que acabou co ollo lesionado, outro sufriu unha ferida na costela e o terceiro foi mordido polo can que había na vivenda.
