Localizan máis de 4.000 doses de cocaína nunha nave abandonada de Redondela

Non hai persoas detidas polo momento

Parte da heroína encautada en Redondela. POLICÍA NACIONAL
photo_camera Parte da heroína encautada en Redondela. POLICÍA NACIONAL

A Policía Nacional incautouse de máis de 4.000 doses de cocaína que estaban ocultas entre uns palés nunha nave abandonada do Viso, en Redondela.

Segundo confirmaron fontes policiais, a investigación iniciouse a principios de maio, cando se detectou actividade de tráfico de estupefacientes no concello de Redondela. As pescudas permitiron localizar unha nave abandonada na que "podería estar a ter lugar algún tipo de actividade ilícita", polo que se estableceu un dispositivo de vixilancia.

Na madrugada deste luns, un coche patrulla do 091 realizou unha comprobación pola zona e os axentes atoparon unha gran chapa metálica que tapaba uns bloques de cementos apilados sobre palés. Ao retirar a chapa atoparon un bote de gran tamaño, cunha sustancia branca no seu interior, ademais dunha báscula de precisión e outros efectos.

Unha vez trasladada a droga a dependencias policiais, constataron que se trataba de cocaína, en concreto, 4.119 doses, que alcanzarían no mercado ilícito un valor de máis de 77.000 euros.

Esta intervención, na que non hai detidos polo momento, foi levada a cabo por axentes da Brigada de Seguridade Cidadá, e tanto a droga como as dilixencias practicadas foron postas a disposición do xulgado de instrución de garda de Redondela.

Comentarios