A xornalista María Casado foi elixida este martes presidenta da Academia das Ciencias e as Artes de Televisión nunha votación na que participou o 45,46% do censo dos membros da institución e na que obtivo 178 votos a favor.
Así se indica nunha nota remitida a Efe pola Academia de Televisión, na que se destaca que Casado é a primeira muller en presidir a institución, cargo no que sucede a Manuel Campo Vidal, que foi presidente durante os últimos 12 anos.
A súa elección, explica a nota, é resultado do proceso electoral convocado o pasado 9 de setembro de 2018.
María Casado agradeceu aos "académicos a ampla confianza que depositaron en min e no meu equipo. Tócanos impulsar unha nova etapa da Academia".
A xornalista agradeceu "a alta participación" e comprometeuse "a liderar esta etapa con e para todos os académicos e facer entre todos unha Institución símbolo da televisión que se fai nas nosas linguas. Moi agradecida e esperanzada".
A nova Xunta Directiva estará composta por un equipo de 23 profesionais de diferentes ámbitos da televisión como Fernando Navarrete, Beatriz Maesso, Pepe Quílez, María José Peláez, Rafael Galán, Joana Carrión, Pedro Olloqui, Juan Ramón Gonzalo, Valentín Carrera e Macarena Rey.
Completan a nova xunta Jesús Lozano, Pilar Socorro, Jacinto García Alonso, Pepa Sánchez Biezma, Tacho de la Calle, Pilar Vergara, Carlos Castel, Alexa Portillo, Paco Moreno, Rosa Díez Urrestarazu, Xota Abril, Tomás Molina e José David Soro.
A Xunta Electoral que presidiu as eleccións estivo composta por Marisa Castillo (presidenta), Juan Francisco Martín (vicepresidente), Francisco Javier López Gil, Santiago Alonso e Marto Egido, conclúe a nota de prensa da Academia de Televisión.
María Casado, nova presidenta da Academia da Televisión
É a primeira muller en presidir a institución, cargo no que sucede a Manuel Campo Vidal
